La Caracola Iniciatives Sociales protagonizó un espeutáculu de música y danza en remembranza de les trece víctimes del franquismu de la matanza de Tiraña.

“Cuando les istituciones quieren qu’escaezamos, remembrar ye obligación”

Cuando mataron a los trece de Tiraña, el 21 d’abril de 1938, la guerra finare, o eso se decía. El de San Pedro Tiraña foi un de los crímenes de venganza perpetraos pol réxime franquista n’Asturies, especialmente llamentable porque foi posible gracies a la collaboración de los caciques del pueblu que facilitaron la llabor a un exércitu enemigu y foriatu, la triestimente conocía Bandera de Lugo.

Dende’l mesmu intre de los asesinatos, y pesi a la prohibición esplícita de visitar mesmo la fuesa onde foron enterraos, los trece de Tiraña recibieron el reconocimientu y l’homenaxe de los asturianos, que nun los dexen cayer nel escaezu. La Casa Cultura d’Avilés foi el más reciente escenariu d’esta remembranza, con una emocionante actuación cola que se presllaba l’Alcuentru de participación-educación popular. La direutora de la obra, Candela Guerrero, ye bisñeta d’un de los asesinaos y recueye asina la tradición familiar de caltener viva la memoria d’estos valientes y de lo que significó la so llucha.

Cola música, na que destacaben delles versiones de cancios populares, ya’l baille protagonizáu por xente mozo, ficieron un percorríu non solo pol drama, sinón pol duru camín del silenciu impuestu a los familiares de les trece víctimes mortales  del franquismu, cuando la represión algamaba de lleno a tola cuenca minera.Los sos nomes tornaron a ser prenunciaos y 13 roses foron entregaes na so memoria, franciendo l’anonimatu nel que’l facismu quiso enterralos.

A la salida, ufrióse a la venta’l llibru “La mio infancia nel franquismu” nel qu’ Enesida García Suárez cuenta, 40 años depués, el crimen de los sos pas y de la so hermana, en Tiraña.

This work is licensed under a Creative Commons Attribution 4.0 International License.