El Proyeutu LIFE+ Gallu Montés Cantábricu, desendolcáu a lo llargo de los caberos seis años, nun foi quien a paralizar -seique si a aselar- el declive d’esta emblemática especie

La  situación actual podría definise como dramática, desapaeciendo ya de numberosos espacios naturales, pente ellos los valles de los Picos d’Europa. La presencia del Gallu Montés n’Asturies amenorgóse a la metá en 20 años, por mor de la caza, el desaniciu del so hábitat y la endogamia.

Dende’l so entamu nel 2010 el proyeutu européu LIFE, en comuña con 72 voluntarios, desendolcó tratamientos selvícoles en más de 500 hectárees pa favorecer l’hábitat del Gallu Montés, retirando 60 km de vallaos peligrosos y entamando talleres escolares nos que participaron más de 2.000 escolinos.

Seique nun entamu pretendíen abrise dellos cientros de cría en cautividá, lo cierto ye que l’únicu en furrulamientu ye l’abiertu en Sobrescobiu, onde 22 exemplares representen la esperanza de la especie, seique les tres femes soltaes va dos años fueron predaes por otres especies. Polémica y complicada, la suelta d’exemplares criaos en cautividá albídrase la meyor opción, dao que la baxa densidá nes fasteres qu’anguañu caltienen exemplares y la so escasa productividá, probablemente por mor de la endogamia, nun garantiza’l mínimu d’anovación poblacional. Arriendes d’ello, la singularidá xenética del nuesu Gallu Montés desaconseya la introdución d’exemplares pirenaicos o centroeuropeos.

Tres del fin del proyeutu LIFE, el Ministeriu d’Agricultura, Pesca, Alimentación y Medio Ambiente anuncia que continuarán tomándose medies de proteición demientres l’añu 2.017  qu’incluyirán la ellaboración d’un inventariu real de la especie (el caberu data del 2005) y la lliberación d’exemplares procedentes del cientru de cría.

This work is licensed under a Creative Commons Attribution 4.0 International License.