Vien Ferrán Adriá a Asturies, diz que’l cachopu nun dexa de ser una croqueta, y móntase la de dios ye Cristu. Sal l´asturianu grandón que toos llevamos dientro y falamos d´ofiensa nacional al nuesu alimentu patriu de moda.

 David Castañón. www.lesfartures.com

Babayada suprema d´un xeniu (quiciabes seya xeniu per estes coses, o quiciabes sepa muncho más de marketing que nós), babayada d´ún de los representantes de la dieta mediterránea que lleven años metiéndonos pol focicu deslloando la nuesa atlántica por pesada, mala pa la salú ya poco llaborada cuando namás hai detrás intereses económicos y políticos.

Paez de baldre venir a Asturies y dicinos cómo hemos de facer les coses, lleven sieglos acomplexando lo asturiano, nun vaiga ser qu´espabilemos y entamemos a defender lo que ye de nueso. Y esi discursu caló, porque ya somos nós mesmos lo que sentimos vergoña.

Sicasí n´Asturies, l´integrismu de caleya de siempres. Decimos CachopO (mirái la definición de la RAE a ver qué pon) cuando ye CachopU (mirái la de lALLA) porque la U ye de bablistes o aldeanos (como si fora daqué malo ser d´aldega), sentamos a xintar con Vinu La Rioja porque’l de Cangas ye malu, facemos de güelecorchos cola sidra mientres la que tien mazana 100% asturiana sigue arrexada pol consumidor y cuando la sidra esplumoso algama ésitos per América equí brindamos con Cava malu pol posturéu de subilo a Instagram.

Eso sí, si daquién-y da por falar o criticar el cachopu, sacamos les uñes y montamos un bon espolín. Falamos d´ofienses nacionales y namás falta una petición formal pa quemar el Bulli (eso sí, cuando vuelva abrir en 2018).

Esfrutemos el cachopu asturianu, valoremos los nuesos productos, defendámoslos pero ensin grandonismos, ameyorando día a día y ensin avergoñanos de lo de nueso.

Mientres, tolos hosteleros que faen cachopu n´Asturies froten les manes…

This work is licensed under a Creative Commons Attribution 4.0 International License.