La fauna asturiana ta desprotexida ante los ataques mortales

La reciente muerte de dos osos pardos en namás cuatro meses nes prosimidaes de Muniellos, fastera en teoría especialmente protexida y xixilada, trai a primer páxina un problema que pon en pelligru al paradisu.

Estos osos vivíen nun de los espacios más emblemáticos del país, col  mayor gráu de proteción posible, Reserva Integral. De pocu yos sirvió. La  situación pola qu’atraviesa la conservación del osu pardu n’Asturies, tres  décades de proteción de la especie y llucha escontra’l furtivismu, sigui siendo esmolecedora, más entá si continúen les campañes d’odiu animal que lleven tiempu persiguiendo al llobu.

Los vecinos de la fastera denuncien que los osos entren nel “territoriu humanu”, averándose muncho más de lo avezao a los pueblos ya istalaciones ganaeres y señalen a la prohibición de dexar los animales muertos en monte, como se facía tradicionalmente, como ún de los principales motivos de que los grandes mamíferos acudan a les poblaciones a la gueta de comida.  L’amenorgamientu del espaciu habitable pa ellos ya’l deterioru mediuambiental son tamién responsables d’esti averamientu.

Pero nun son solo los osos. Llobos decapitaos o colgaos como troféu amuesen un l’odiu faza lo nueso que raya la sicopatía. Un total de 225 animales xabaces, pente ellos tres osos (ensin cuntar los dos casos recientes, entá ensin determinar si foron envelenaos), 38 llobos,  46 utres lleonaos, 17 zapiqueres y dellos frangüesos y aigles morrieron víctimes del velenu nos caberos años, la mayoría por estricnina, tósicu prohibíu dende va 20 años.

Seique s’utiliza comu escudu los porgüeyos de los ganaeros, tres d’esta campaña hai bon númberu  de cazaores, ya que medren los ataques de manaes de llobos (pente los que sosprende alcontrar tamién perros axabazaos) a perros de caza, tornándolos en cazaores cazaos.

Los argumentos de los detractores d’estos animales queden n’entedichu cuando espoxiguen les denuncies falses por daños (más de venti l’añu pasáu). Sicasí, ye innegable qu’esiste un problema nel que los ganaeros y agricultores tienen muncho que dicir y les alministraciones publiques muncho que trabayar.

Ye urxente que se protexan estes especies y que se cree un entornu de convivencia respetuosa nel que los animales asturianos y les nueses xentes puean alcontrar el so llugar en seguridá.

This work is licensed under a Creative Commons Attribution 4.0 International License.