Ediles d’IU y SOMOS Mieres encamienten al Gobiernu y a la Xunta Xeneral una reforma del Estatutu pa declarar la oficialidá, seique nos ayuntamientos nos que gobiernen ellos entá nun la declararen.
IU y SOMOS Mieres, cola astención del PSOE vienen d’aprebar en pleno una moción con la qu’encamentar al Gobiernu d’Asturies y a la Xunta Xeneral que declaren la oficialidá de la llingua asturiana, recoyendo’l sentir de la gran mayoría del pueblu asturianu.
Como fuerza mayoritaria nel so conceyu, estos partíos podríen declarar direutamente la oficialidá nel so ámbitu, como se fizo en Bimenes, o nel so defeutu podríen aprebar unes Ordenances de Conceyu que reconocieren los drechos llingüísticos de los mierenses, como se fizo en Noreña, sicasí fasta l’intre nun se tien conocencia de dalu movimientu nesi sen por parte de los dos partíos, lo que ye denunciao por dellos coleutivos en defensa de la llingua de “posturéu” y “poco compromisu.”
Lola Suárez, cabezalera de la Estaya de Llingua y Cultura Asturiana d’Andecha Astur valoró positivamente encamentar al Gobiernu y a la Xunta Xeneral una reforma del Estatutu pa declarar la oficialidá, pero criticó “Na práutica totalidá de los Conceyos onde hai mayoría de conceyales de formaciones polítiques teóricamente respetuoses colos drechos llingüísticos de los vecinos, Podemos, IU y Foro principalmente, nun tan faciendo un res pola oficialidá de la llingua asturiana y estrémense perpoco de lo que faen los Conceyos con mayoría del PP, PSOE, enemigos declaraos del asturianu”.
La meyor oportunidá pa facer realidá la hestórica demanda de los asturianos foi nel intre en qu’IU tuvo la posibilidá de condicionar el sofitu al PSOE en Principáu a la oficialidá, pero otros intereses tuvieron per delantre de los llingüísticos, sigún denuncia Lola Suárez, “prefirió renunciar a ello y negociar puestinos, faciéndose cómpliz de la represión llingüística y la galleguización del ocidente asturianu que prautica’l PSOE dende’l Principáu.
IU y Somos Mieres entá nun ficieron dala declaración esclariando si tienen pensao o non camudar la so política llingüística nos sos conceyos.
This work is licensed under a Creative Commons Attribution 4.0 International License.
