El banzáu, parte d’una antigua piscifactoría, continua vertiendo agües residuales nel ríu Al.ler, seique la esplotación lleva un añu fuera de furrulamientu.

Según denuncia la Coordinadora Ecoloxista d’Asturies, el banzáu supón una torga infranqueable pal conxuntu l’ecosistema fluvial, qu’anguañu se ve seriamente perxudicáu pola deficiente calidá  les agües, ya que la piscifactoría caltién una concesión que-y permite detraer del ríu un caudal  de 250 l/s y verter nelli agues residuales con un volume de 750 l/s.

Pente los más perxudicaos por esti banzáu alcuéntrase la fauna autóctona, con especies como la llóndriga (Lutra Lutra) o’l desmán ibéricu (Galemys pyrenaicus), ambes recoyíes nel Decretu asturianu 143/2014, de 17 d’avientu, pol que se declara la Zona Especial de Conservación de los Ríos Negru y Al.ler (ES12000054).

La piscifactoría escúdase na actual calificación de la parcela ocupada polos estanques de la piscifactoría como Suelu Urbanu Industrial, dientro del Planeamientu Municipal Urbanu del Conceyu d’Al.ler, tecnicismu que los miembros de la Coordinadora Ecoloxista denuncien como una maniobra municipal incomprensible “Daos los riesgos d’inundación y l’afección al dominiu públicu”, al tratase d’una fastera calificada como industrial en plena ribera fluvial. Alvierten tamién del riesgu del espoxigue de naves industriales na fastera, amparada nesta calificación.

Poro, solicitaron a la Confederación Hidrográfica d’Asturies la estinción darréu de la concesión otorgada a la Piscifactoría d’Entreagües y l’esbarrumbe de les obras allugaes en ríu, asina como l’apertura de les dilixencies afayaices pa esclariar el motivu de la nuea autorización de vertíu d’agues residuales d’una piscifactoría presllada.

This work is licensed under a Creative Commons Attribution 4.0 International License.