Toles estayes productives presenten una evolución negativa.

Acordies a los estudios desendolcaos pol SADEI (Sociedá Asturiana d’Estudios Económicos ya Industriales), la economía asturiana entama l’añu cola tiesta gacha: los indicaores amuesen un amenorgamientu na productividá de toles estayes.

Los datos proceden de numberoses encuestes y comparaciones de datos pente los resultaos algamaos l’añu 2.015 y los del 2.016, siendo un bon indicaor de la tendencia anual.

La producción industrial que rexistra l’IPIA (Índice de Produción Industrial d’Asturies) presenta una merma emportante, con un descensu del 3,2 por cientu  xeneral que correspuende en gran midía al desaniciu de la industria minera  y metalúrxica, asina comu a la notable baxada de la produción enerxética. Dientro de la industria, la única que presenta datos positivos ye la química, qu’esfrutó d’un incrementu  del 26% respeuto al añu anterior, contrastando fuertemente col restu de resultaos.

Nun entamu pue abultar que la estaya ganaera ye la más afortunada, ya que la produción, tanto de carne como de llechi son les que menores descensos ufren – seique los datos siguen siendo negativos -. Per otru llau, la importante baxada nel preciu de la llechi, foi enforma dañina pa los ganaeros del país.

Nel casu contrariu ta’l seutor pesqueru, que foi con diferencia’l más perxudicáu del añu. Nesta estaya productiva la llaceriosa mengua en captures -de más del 50% a lo llargo del añu 2.016- vese discretamente amenorgada por una llixera medra nos precios del pexe.

Na estaya servicios, los resultaos nun desemeyen endemasiao de los del restu, esceptuando quicias les ventes en grandes almacenes. El clima, más secu de lo avezáu, nun foi aliciente abondo pa torgar los malos resultaos y la ocupación hotelera cayó más del seis por cientu.

This work is licensed under a Creative Commons Attribution 4.0 International License.