La Plataforma d’Afeutaos pola Hipoteca  d’Asturies paraliza la desfiucia d’una familia con tres menores n’Uviéu

A  Jonathan Álvarez González y a los sos tres rapacinos, de seies, siete y tres años diben a echalos de casa esta mesma mañana, pero l’actuación de la Plataforma d’Afeutaos pola Hipoteca  d’Asturies torgó que la desfiucia se llevare a cabu.

De  magar les 8:30 la mañana dellos miembros de la Plataforma acompangaron a la familia, a la espera de  la comitiva xudicial que viniere a desfiucialos. Ante la so presencia la desfiucia quedó paralizá ensin fecha prevista, ello ye, que los van echar de casa pero entá nun saben cuando.

Nesti casu concretu, esti retrasu ye perimportante, ya qu’esta familia namás precisaba d’unos díes estras pa que pudieren treslladase a un posible nuéu abellugu, díes qu’al entamu  la empresa yos negaba.

La odisea d’esta familia entamó con una riestra d’operaciones de polmón del pa, que finaron col so despidu del puestu de camioneru nel Ayuntamientu de Caravia onde trabayaba. Un posterior trabayu, nuna empresa que tien conveniu col Principáu, derivó nuna quiebra de la mesma con serios impagos.

De magar entós sobreviven camudando  de vivienda en vivienda y esta mañana tuvieron en seriu pelligru de finar na cai. La problemática de la vivienda continúa echando a los asturianos de les sos cases, al mesmu tiempu que medra’l númberu de cases desocupaes.

Les aiciones de la PAH d’Asturies lleven paralizando más de mil desfiucies n’Asturies, ya seya parándolos en direuto, pola vía llegal o por negociación. Dende la plataforma animen a les presones que tean en riesgo de desfiucia o tean problemes col so bancu por mor de la hipoteca, qu’acudan a los sos conceyos a informase.

This work is licensed under a Creative Commons Attribution 4.0 International License.