El casu de Yuma, la neña de la Felguerina ensin tresporte pa dir al istitutu col qu’entamábemos l’añu, paez que ta solucionáu (seique con coste económicu pa la familia), gracies al enfotu d’unos plas que tienen nidio los sos drechos y que nun tuvieron mieu d’enfrentase a la Conseyería por defender el drechu de la so fea a vivir en pueblu y siguir los sos estudios. Sicasí, ella nun ye l’xunicu casu: Berducéu, Buseco, Aguanes, Caleyu o Cerréu son dalgunos de los núcleos nos que les families s’alcuentren  con problemes pa llevar a clase a los sos feos.

Los brutales recortes económicos nel presupuestu al tresporte escolar, impuestos pola Conseyería d’Educación, qu’afeuten a unes 150 families asturianes, escluyíes por decreto de les rutes de tresporte escolar concertaes, xúnense a lo ruino de les compensaciones económiques apurries a les families que tienen que treslladar polos sos propios medios a los escolinos, un gastu adicional difícil d’asumir.

Al mesmu tiempu, présllense escueles rurales que podríen torgar la necesidá de tresporte.

Teniendo en cuenta que la educación en casa nun ye una opción n’Asturies y poro, que los neños tienen la obligación d’acudir al cientru tean o non forma d’aportar diariamente dende la so casa, la solución de munches families pasa pol treslláu a fasteres urbanes. Esta ye una opción que camudará dafechu la vida de les families y que ya afeuta nidiamente al mapa demográficu asturianu, fomentando la despoblación d’unos núcleos ya enforma mancaos pol envieyecimientu, el declive de l’agricultura y la ganadería y la falta de servicios –albídrase que’l 35% de la mocedá rural asturiana se desplazará a una ciudá -. Tou esto tien consecuencies perfondes, tanto a nivel del desenraigonamientu presonal comu na terrible perda identitaria derivada del allonxamientu d’una cultura y unes formes de vida  hestóriques.

This work is licensed under a Creative Commons Attribution 4.0 International License.