Ante les abondes agresiones denuncien l’espoxigue de grupos nacis y fascistas, declarándose esmolecíos pola impunidá llegal y mediática d’estos coleutivos y pola fuercia cola qu’idegues xenófobes tan calando pente la población.

L’espoxigue de los ataques d’estos grupos organizaos, tantu a inmigrantes comu a les organizaciones sociales y politiques d’izquierdes -agresiones, pintaes, estroces, sabotaxe de monumentos históricos…- nun tien malpenes repercusión mediática, pero los ataques tan ehí y la población asturiana, como ya ficiere hai años, posiciónase escontra’l facismu. “Tol mundu pensaba que nes cuenques eso nun podía pasar, un llugar como esti que sufrió tanto les garres del fascismu, onde tantu mal fixeron, onde la xente siempre s’enfrentó a él, onde’l pueblu siempre s’organizó… Pos sí, pasó y ta pasando” .

Encapuchaos que se posen del coche a pegar y menaciar a la xente, un coche estrozáu a la puerte casa, el robu d’un móvil con agresión pa guetar información, posteriores agresiones, menacies a los qu’ esparden convocatories antifascistas… esto ta pasando nes cuenques esti caberu mes.

Dende Nalón Antifascista denuncien un sistema que los respalda “Nun faen les coses a lo xole, asina a saltu mata, preparen les sos aiciones con antelación, tienen estudiao como faer cada aición. Organícense’n pequeños grupos, en mas d’un coche y ataquen, porque la so xera ye esa, amedranar a quien s’organiza, atacar a quien ye distintu o a rapacinos y rapacines qu’identifiquen como persones d’izquierdes, asina de triste, faciendo’l trabayu gratis al estáu y a la policía, d’ehí la so impunidá.”

Apunten a los grupos de siguidores fubolísticos comu los Ultraboys o Salvajes Langreo, que, antroxaos d’intereses esportivos, furrulen d’anzuelu pa captar a la mocedá y dir averándolos llueu a les sos ideoloxíes.

“ Nun podemos permitir que vuelva repetíse la historia” insisten “y pa eso nun podemos olvidala, quien nun tien memoria nun tien futuru a la llarga.” Poro, dende Nalón Antifascista piden a tola población asturiana que te sollerte a cada comportamientu fascista, racista, xenófobu, homófobu o machista y que nun se callen ante ellos.

This work is licensed under a Creative Commons Attribution 4.0 International License.