Los trabayaores manifiéstense a les puertes de la factoría de CAPSA en Sieru, nel primer díi de les tres xornaes de fuelga convocaes

La concentración de trabayaores a les puertes de la factoría dende primer hora de güei xeneró delles escenes de tensión, al torgar cola so  presencia la entrada de los direutivos de la empresa, que negociaron cola Guardia Civil la posibilidá d’entrar escoltaos.

Ante’l fracasu de les conversaciones para algamar un alcuerdu nel conveniu coleutivu cola direición,  el comité d’empresa de la Corporación Alimentaria Peñasanta (CAPSA) convoca pa esta selmana tres xornaes continues de fuelga qu’entamaron güei.  Anantes de decidise a adotar esta midía, los trabayaores y la empresa acudieron al SASEC (Serviciu Asturianu de Solución Estraxudicial de Conflictos) pa intentar algamar un alcuerdu, pero nun foi posible.

El comité reclama garantizar el poder alquisitivu de los trabayaores, venceyando los sos salarios a la evolución del IPC, asina como garantizar la prioridá de los fíos y socios de la cooperativa pa les nueves contrataciones y aprofitar los beneficios de la empresa pa implantar meyores sociales. Reclamen tamién una «mayor tresparencia na xestión ante la desinformación esistente, al nun conocer la xestión del direutor xeneral»

De les 750 presones que trabayen  na central de Granda, foron convocaes a la fuelga 500 trabayaores, correspondientes a les empreses CAPSA, ASA, Geomer y CLAS. El siguimientu de la primer xornada de paru ye  práuticamente del 100%

This work is licensed under a Creative Commons Attribution 4.0 International License.