APIAA entama esti fin de selmana unes xornaes dedicaes a l’arqueoloxía fuera de les nueses fronteres

Un total de cinco charres componen el programa d’intervenciones que tendrán llugar pente’l vienres 17 ya’l sábadu 18 de febreru nel Salón d’actos del Muséu Arqueolóxicu d’Asturies

El primer díi dedicaránlu a Sudamérica, entamando les xornaes cola inauguración de la esposición “Ciudaes coloniales hispanoamericanes, Testimonios materiales” na que se fadrá un repasu a los vestixos dexaos poles polítiques colonialistes del imperiu español nel cientru y sur d’América. Continuaráse cola intervención de Fernando Vela Cossio que falará de la primer fundación española en Perú, ya’l díi finará cola charra del equipu de la Universidá del País Vascu que desplicará’l primer intentu colonizador del Conu Sur (Arxentina)

La segunda sesión tará centrada en proyeutos desendolcaos n`África. Jorge de Juan y Yasmina Cáceres desplicarán el proyeutu del so equipu na islla de Santiago, República de Cabu Verdi. Víctor Fernández Martínez resumirá les sos investigaciones nes misiones xesuítiques  n’Etiopía.

Con estes xornaes l’Asociación de Profesionales de l’arqueoloxía Asturiana  (APIAA) quier dar a conocer al públicu asturianu dalgunos de los proyeutos que se desendolquen fuera de les nueses fronteres. La entrada sedrá de baldre fasta completar aforu.

This work is licensed under a Creative Commons Attribution 4.0 International License.