El PSOE ta trabayando nuna proposición de llei que tien l’envís de da-y puxu a les llingües oficiales del Estáu en tolos ámbitos de l’alministración y  grandes empreses. Iniciativa pol Asturianu, y dientro del marcu d’esta propuesta, solicitó a los diputaos asturianos del PSOE nel Congresu “que la llingua de los asturianos seya tenida en cuenta nesa propuesta llexislativa pues gocia d’un marcu de proteición que nun tien porque ser escluyente pa esta proposición”.

La entidá comparte dafechamente la declaración de los autores d’esta proposición de llei, onde se diz testualmente que “El fortalecimientu de cualquiera de les llingües españoles nun va en desterciu de les otres. Nun tien por qué esistir, y ye un erru decilo neses pallabres, una competición ente llingües, un xuegu de suma cero”, anque recuerda que  la Llei 1/98 del 23 de marzu, d’Usu y Promoción del Asturianu diz que “L’asturianu como llingua tradicional d’Asturies, gociará de proteccion”, polo que’l gobiernu asturianu habría reclamar esta protección tamién al gobiernu estatal.

Recuerden dende Iniciativa “que la llingua de de la nuesa comunidá gocia d’un marcu de proteición, lo que fai que la sociedá civil asturiana tea en condiciones d’esixir que s’aplique la llei y qu’ésta se tenga en cuenta en casu de que s’amplien les condiciones de la mesma”. Nesti sen, Iniciativa pol Asturianu anunció que va tar ehí reivindicando esta situación, al empar qu’ufiertando la so collaboración y trabayu pa da-y presencia al asturianu nel marcu d’esti nuevu proyectu de llei.

This work is licensed under a Creative Commons Attribution 4.0 International License.