L’Asociación de Celiacos del Principáu d’Asturies tien de dexar el so llocal nel antiguu HUCA y prega a les alministraciones que se-y conceda un nuevu allugamientu
E.Urquiola.
A ACEPA terminase-y el plazu. El prósimu vienres 26 de febreru l’Asociación de Celiacos del Principáu d’Asturies tien de dexar el llocal onde s’atopa y camudase d’allugamientu. El motivu respuende a que l’últimu edificiu del antiguu HUCA cierra les sos puertes definitivamente. L’asociación ta tratando d’atopar un nuevu espaciu disponible. “Lo ideal sedría tar nel nuevu HUCA por delles razones. En primer llugar pola cercanía colos servicios de detección y tratamientu de la enfermedá, y tamién pola accesibilidá pa los enfermos. Amás, supon un respaldu de les sociedaes sanitaries a favor de l’asociación” señala Carlos Celoriu, presidente de ACEPA.
Celoriu indica igualmente que, en casu de que nun seya posible que-yos alluguen nel nuevu HUCA, tamién resultaría interesante que’l Conceyu d’Uviéu yos cediere un llocal onde poder siguir exerciendo l’actividá de l’asociación. El presidente de l’asociación esplica que’l conceyu sí que-yos ufiertara un espaciu. Pero esti ye compartíu, y por cuenta de la información sensible que remanen en relación a la salú de les persones qu’atienden, nun ye’l más fayadizu. Poro, siguin aportunando na necesidá de cuntar con un local propiu.
Les carauterístiques que pidin pal nuevu allugamientu son: la yá nomada exclusividá, pa la seguridá de los datos y les conversaciones que caltienen colos que carecen celiaquía. Un espaciu pa realizar los llabores alministrativos, y que les instalaciones cunten colos requisitos mínimos d’acesiblidad. “Y tamién ye importante que sía un sitiu prestosu por que les persones afectaes cunten con un espaciu atopadizu, un llugar onde los mesmos miembros de l’asociación s’afayen a gustu, una y bones tou nuesu llabor ye cien por cien altruista”.
L’Asociación Celiaca Principáu d’Asturies ye una entidá de calter priváu, ensin ánimu d’arriquecimientu. Arrexuntando con calter voluntariu a persones diagnosticaes d’Enfermedá Celiaca, padres o tutores de menores celiacos y a toos aquellos pacientes que’l so tratamientu esixa caltener una dieta ensin gluten.
This work is licensed under a Creative Commons Attribution 4.0 International License.
