El proyeutu Xixón Turismu Responsable ñaz de la necesidá de sensibilizar y concienciar a empreses turístiques de Xixón na estaya de la caltenibilidá depués de que la ciudá algamare la Certificación Biosphere qu’otorga l’Institutu de Turismu Responsable, entidá asociada a la UNESCO, miembru de la Organización Mundial de Turismu y miembru fundaor del Conseyu Global de Turismu Caltenible (GSTC).
L’oxetivu d’esti proyeutu ye afitar un decálogu de bones práutiques responsables como serviciu turísticu o como organizador d’eventos responsables y evidenciar el so cumplimientu y el compromisu real de la empresa o serviciu col mediuambiente, la sociedá y la cultura tradicional del destín.
Anguaño, empreses y servicios como l’Hotel Abba Playa Xixón, Hotel Tryp Rey Pelayo, Parador de Xixón, Hotel San Miguel, Hotel La Polar, Infogijón, LABoral Centro d’Arte, Laboral Ciudad de la Cultura, La Cuadra d’Antón, Casa Trabanco, mg.lab, Eco-lógica Actividades, Bnfit-Talaso, Catering Malena-Tierra Norte y CIFP Hostelería y Turismu algamaron esti cuñu del proyeutu, llideráu poles asociaciones empresariales Club d’Empreses de Turismu de Negocios d’Asturies y Xixón Calidá Turística.
Dientro d’esti proyeutu, XixónSeCome compensó l’impautu ambiental xeneráu na so primer edición, cellebrada n’avientu de 2016, impulsando una xornada educativa so caltenibilidá y mediu ambiente en collaboración col colexu Montedeva de Xixón. Los escolinos llantaron árboles y deprendieron a preparar recetes d’enfoque caltenible.
This work is licensed under a Creative Commons Attribution 4.0 International License.
