“La Oficialidá ye inevitable ya inegociable”, afirma Lola Suárez, cabezalera de la Estaya de Llingua y Cultura Asturiana d’Andecha Astur

Nes sos declaraciones Lola Suárez valoró perpositivamente la rempuesta de la sociedá asturiana nel Díi de la Llingua Materna, xornada dedicá al sofitu de les llingües maternes en tol mundiu, nel que quedó nidio que la sociedá asturiana ta ca vuelta más comprometío cola llingua d’Asturies.

A lo llargo d’esi díi desendolcáronse per tol país bayura d’actividaes reivindicando los drechos de la llingua d’Asturies, siendo la declaración d’Oficialidá, como destacó Lola, un requerimientu xeneralizáu en tolos actos ya intervenciones d’esi díi:

“La sociedá asturiano tien nidio que la Oficialidá ye un puntu partía pa la normalización llingüística n’Asturies, y persabe que tolo que se faiga ensin pasar perí nun son más que maniobres de distraición. A estes altures el “Principado” debiere ser cosciente de que nun engaña a naide, y que la Oficialidá ye inevitable ya inegociable”

El díi la Llingua Materna ye una xornada declarada pola UNESCO, que se celebra cada 21 de febreru dende l’añu 2000, p’afalar la diversidá llingüística, cultural y el multillingüismu.

Dientro les actividades cellebraes esi díi destacamos por prestosa l’estrenu por parte’l I.E.S númberu 5 d’Avilés d’un curtiumetraxe ellaboráu pol alumnáu de primeru d’ESO matriculáu na asignatura d’Asturianu. El curtiu, entituláu “Veníi a xugar conmigo”, ye obra de los escolinos Izan Álvarez, Íker Corujedo, Marcos González y Nel Llope, cola ayuda del so profesor de Llingua Asturiana y Lliteratura, Inaciu Galán. El curtiumetraxe “Veníi a xugar conmigo” pue vese yá na rede  y va proyectase nes clases a lo llargo d’esta selmana, amás de circular nes redes sociales, al traviés de la cuenta de l’asignatura d’asturianu nel centru en Twitter @ies5asturianu.

This work is licensed under a Creative Commons Attribution 4.0 International License.