Esmolecimientu ante les declaraciones de dellos alcaldes anunciando que tán a la gueta de “praos fayadizos” pa los vertíos de la basa contaminada viniente de los dragaos de los puertos

Dalgunos de los puertos asturianos, como los de Bustiu y Llanes, lleven ciertu retrasu nos sos dragaos, lo que’l Principáu” xustifica alegando un posible problema de contaminación de los mesmos, problema que solo s’agravaría si la basa ye treslladá a zones verdes, en llugar de cumplir cola normativa vixente.

Poro, la Coordinadora Ecoloxista d’Asturies remembró a la Conseyería d’Infraestructures, Ordenación del Territoriu y Mediu Ambiente que nun se  permiten atayos na xestión de la basa contaminada de los puertos previstos a dragar y qu’esiste una Llei de llixos y suelos contaminaos que tien de cumplise.

Seya que non, la llei esixe qu’inclusive un sedimentu non peligrosu, “tendrá de ser clasificáu nuna o más categoríes de les que s’establecen nel presente artículu en función de la concentración de contaminantes que presenten y/o de los efeutos tósicos que pudieren producir na la biota marina”.

Teniendo en cuenta que’l Principáu” indicó específicamente la peligrosidá de los vertíos, tendría d’aplicase lo axustao nel artículu 23, “la so reubicación va ser posible namás por almacenamientu en recintos específicamente construyíos pal almacenamientu de productos contaminaos, con paréis impermeables y dispositivos que dexen controlar la fuga de lixiviaos”, daqué que ye perestremao de la solución de los praos.

Por tou ello la C.E.A esixe que la basa contaminao que se saque de los puertos se tresllade, siquier, a un vertideru autorizáu o nel so defeutu a unes finques preparaes de manera que dexen controlar la fuga de lixiviaos y que garanticen que nun haiga riesgu de filtración de los contaminantes nel sosuelu.

This work is licensed under a Creative Commons Attribution 4.0 International License.