El doctor en bioloxía impartió una conferencia nel Niemeyer sobre la visión del océanu de Julio Verne 148 años dempués del so llibru ‘Venti mil llegües de viaxe somarín”

Compartió la so visión sobre esti escritor francés, céllebre poles sos noveles d’aventures y pola so influencia nel xéneru de la ciencia fición,  recalcando que les sos descripciones y visiones, consideraes bien alantraes a la so dómina, taben basaes en conocencies reales, acontecimientos o noticies de les que tuvo costancia polos sos munchos viaxes.

Aprofitando la so visita a Avilés, remembronos la importancia del que ye consideráu’l valle submarín de mayor fondura del mundu, el Cañón d’Avilés,  colos sos 4750 metros de fondura que percuerren bona parte de la mariña asturiana, dende Avilés  fasta Navia.

Esta fuesa marina ye “un ecosistema irrepetible” con 1.380 variedaes animales catalogaes, como corales d’agua frío, esponxes y tiburones de fondura. El fondu valle marín abelluga tamién una importante cantidá de mamíferos, como la tolina mular, los botos, la tonina, la tolina común y la llistada, el calderón común, los zifios y el cachalote pigméu. Tamién los grandes cetáceos tienen cabida, como’l rorcual común ya inclusive los cachalotes.

Créese que ye’l llar del Pelosín o calamar xigante (Tanigia danae) y esisten dientro ‘l valle somarín unes 800 especies d’organismos bentónicos (propios de los fondos marinos) Topáronse nesti enclave más de 20 especies desconocíes y, según l’oceanógrafu, entá queden por afayar, polo que la so protección ye especialmente importante, lo que l’añu pasáu llevó a la Xunión Europea a aprobar la so inclusión nes llistes biogeográficas como Llugar d’Importancia Comuñal (LIC)

Javier Cristobo participó en 33 proyectos d’investigación sobre la fauna marina fonda, estudiando los ecosistemes marinos vulnerables y árees marines protexíes. Cuenta con quince estancies en centros d’investigación estranxeros y tomó parte n’espediciones científiques que percorrieron l’Atlánticu Norte, Portugal, Namibia, Patagonia, Mar del Norte, Suráfrica y Cabu Verde. Tuvo n’ocho vegaes na Antártida. El biólogu y buceador profesional publicó amás alredor d’ochenta artículos científicos y de divulgación en revistes especializaes y dirixió delles tesines y tesis doctorales.

This work is licensed under a Creative Commons Attribution 4.0 International License.