Desixen que se ponga en marcha en Nuevu Santullano un plan d’actuación nel qu’intervengan toles fuerces de seguridá con presencia nel conceyu: Policía Llocal, Guardia Civil y Policía Nacional

El Nuevu Santullano ye una concentración de cuasi 400 viviendes sociales, nun allugamientu aislláu dafechu de la trama urbana esistente, y qu’entá escarez de los equipamientos públicos previstos, necesarios pa la normalización de la vida en barriu, amás de cuntar con numberoses viviendes en mala traza d’habitabilidá por desdexar el caltenimientu y l’arreglu de los inmuebles.

Esta concentración, frutu de la política de vivienda desendolcada por VIPASA, contribúi a la xeneración de guetos, al nun permitir la integración de los estremaos grupos nin la diversidá social de la redolada.

Pa Podemos Mieres la solución pasa por un mayor control que garantice la seguridá y denuncia que “Lleva años estudiándose la posibilidá de poner en marcha un plan d’actuación nel qu’intervengan toles fuerces de seguridá con presencia nel conceyu: Policía Llocal, Guardia Civil y Policía Nacional, pero esti nun acaba d’arrincar, magar socesos graves”.

Tamién proponen la implicación de les entidaes sociales y culturales al traviés d’una escuela de pás y más p’ayudar a les families a establecer unes pautes na educación de los más pequeños.

This work is licensed under a Creative Commons Attribution 4.0 International License.