Les dos plataformes polítiques nes que se dixebra’l nacionalismu gallegu van celebrar los sos respectivos congresos esti mes de marzu

Na actualidá les distintes corrientes y organizaciones del nacionalismu gallegu tan reagrupaes mayoritariamente en dos grandes frentes. Per un llau, el Bloque Nacionalista Galego, que dende 1982 impulsa’l partíu comunista UPG, y per otru, Anova-Irmandade Nacionalista, surdida en 2012 col lideralgu del hestóricu militante socialista Xosé Manuel Beiras.

Nos caberos tiempos mientres el BNG persistía na so tradicional política d’aliances d’estrictu calter nacionalista, inclusive con sectores de centru, Anova esperimentó distintos ensayos con partíos de la esquierda española.

Nes recientes elecciones al Parlamentu Gallegu, celebraes el 25 de setiembre de 2016, el BNG con 119 446 votos (8,33%) llogró 6 escaños, perdiendo ún al respective del 2012, los peores resultaos de la so hestoria dende 1989; paralelamente En Marea, la llista qu’integraba tres complicaes negociaciones a Esquerda Xunida, Anova y Podemos, con 273 523 votos (19,07%) obtendría 14 escaños, cinco más que la coalición d’Esquerda Xunida y Anova nel 2012. Por embargu la suma de dambes fuercies polítiques en términos sociales y electorales nun representa muncho más que los meyores resultaos del BNG en 1997, presentando a Beiras como candidatu, con 395.435 votos (25,11%) y 18 escaños.

El BNG celebrara la so XVI Asamblea Nacional los díes 25 y 26 de marzu n’A Coruña, tres un procesu previu d’alderique internu, que duró casi un añu, nel cual promoviose especialmente la participación de la militancia de base. Na propuesta estratéxica Avanza Galiza ye encetada “la necesidá d’incorporar la transversalidad” col fin de “siguir siendo la casa común del nacionalismu”.

Anova va desendolcar la so III Asamblea Nacional el día 18 de marzu en Pontevedra. La propuesta organizativa refuga la so estructuración como un partíu tradicional de mases en beneficiu de les candidatures d’unidá popular, que son consideraes como prioritaries. Abiertamente plantégase qu’En Marea nun puede derivar nuna simple coalición electoral de partíos clásicos, sinón que se tien que consolidar como un movimientu sociopolítico de rotura col réxime dende la base.

This work is licensed under a Creative Commons Attribution 4.0 International License.