Esti ye’l cuartu añu que se cellebra n’Asturies esta iniciativa que tien como oxetivu promover l’usu diario y cotidiano de la bicicleta.
Ca añu, el mes de marzu , miles de persones en tol mundu comprométense a usar la bici n’abril y a convencer a otros pa faer lo mesmo y esfrutalo xuntos.
Pa participar nesti proyectu, lo primero ye Rexístrase na páxina “El Compromisu” comprometiéndote a usar la bicicleta siquier un puquiñín al díi. 30 Díis en bici namás tien una norma: “pedalia a cualesquier parte ca díi durante los 30 díis d’abril -una vuelta a la mazana, 20 kilómetros, fasta’l trabayu, o un paséu al atapecer, lo que seya que te venga bien- y comparte les tos aventures online”.
Porque esa ye la otra parte del tratu, tuitear les hestories sobro dos ruedes coles etiquetes #30díasenbici o #30DEB o nel muriu de Facebook o nel to propiu blogue… de lo que se trata ye de visibilizar estos 30 díis.
Anguañu esisten dos grupos de 30 díis en bici n’ Asturies, el de Xixón , que cellebra esti añu la so cuarta convocatoria y el d’Uviéu, que s’estrena , pero l’apertura de nuevos grupos ta abierta a tolos que quieran apuntase a pedaliar. Nes ciudaes participantes van convocase eventos, escursiones y salíes en grupu pa faer más petecible la idega… y comu nun podía ser d’otra mena, el postrer díi, espicha sobro ruedes…
This work is licensed under a Creative Commons Attribution 4.0 International License.
