Empate inéditu ente’l decadente Democratic Unionist Party y el reforzáu Sinn Féin

Tres el colapsu políticu producíu’l pasáu mes de xineru nel Gobiernu unitariu compartíu ente la derecha unionista y la esquierda independentista, cola dimisión de Martin McGuinness como viceministru principal, la convocatoria d’unes elecciones anticipaes pal Parllamentu de Belfast finalmente acabó xenerando un escenariu totalmente novedosu.

Dempués d’una llucha electoral especialmente complicada’l Democratic Unionist Party (28,1% de los votos) menguó la so representación parllamentaria hasta los 28 escaños, namás ún más que’l cada vuelta más afitáu Sinn Féin (27,9%). Nel Parllamentu saliente la diferencia ente dambos partíos yera de diez escaños. Por detrás quedaron el Páirtí Sóisialta Daonlathach an Lucht Oibre (11.9%), con 12 escaños; el Ulster Unionist Party (12.9%), con 10 escaños; y el centrista Páirtí Comhghuaillíochta Thuaisceart Éireann/Alliance Party of Northern Ireland (9.1%), con 8 escaños.

Gerry Adams, nun actu postelectoral nel oeste de Belfast, señaló que “la noción d’una perpetua mayoría unionista quedó atrás”. La nueva composición del Parllamentu implica un cambiu fundamental na correllación de fuercies esistente hasta agora nel enclave colonial del Reinu Uníu na isla d’Irlanda, al cual el “cleavage” del Brexit británicu al respective de la Unión Europea nun foi ayenu.

This work is licensed under a Creative Commons Attribution 4.0 International License.