Llucía Fernández Marqúés

Ye 8 de marzu y les muyeres del mundiu xúnense nuna convocatoria ensin precedente en defensa de los sos Drechos. Baxo la conseña “Nosotres Paramos” muyeres de alrededor de 50 países, incluyía Asturies, pondránse’n fuelga pa desixir que se reconozan los aportes cotidianos que les muyeres faen a la humanidá.

El llamamientu inclúi la fuelga llaboral ya personal, pidiendo a les muyeres que por un díe nun desendolquen les sos llabores de curiaores de neños y mayores, nin les de la casa, amás de les del trabayu. La idega ye que  d’esta mena  la sociedá  vea, siquiera por un díe, la importancia del trabayu diariu de la muyer.

N’Asturies les muyeres carecen, en munchos casos, una doble xornada esgotadora, la llaboral, na que ye davezu esplotada, malpagada y menospreciada nel so llabor, que vien a sumase a la familiar, na qu’atiende a fíos, vieyos y les llabores d’una casa poques vegaes compartíes. Les consecuencies a nivel personal tan nidios, esgotamientu, falta tiempu pa sigo mesma, abandonu d’intereses y proyeutos presonales… pero a nivel social esta doble xornada tamién tien consecuencies tarreceores,  falta de participación social, escasez de presencia política, ausencia de representación y poro masculinización de tolos ámbetos.

Por supuesto, esi nun ye’l mayor problema de les asturianes anguañu. Conozo poques muyeres que nun carecieren na so vida a lo menos un casu d’abusu o acosu sesual. Nun conozo denguna que nun careciere dalguna triba de machismu. Ta nidio que nun se pue tomar la mio esperiencia nin la de les mios conocíes comu norma pa facer una estadística, pero albidro que da una idega clara de la situación.

Los casos más sangrantes (lliteralmente), los que salen nes noticies, falen de muyeres asesinaes (que non “muertes”, hai qu’estremar), de secuestros, de palices, de menacies, de violaciones, de violaciones en manada… Situaciones llacerioses que nun prevoquen más que titulares morbosos y aparentes conmociones ensin consecuencia. Tamos fartuques de nun emportar. Poro, mañana aparamos, poro, mañana nun escribo.

N’Asturies el manifestamientu tendrá llugar a les siete de la tarde en Xixón, con salida nel Paséu de Begoña. La Plataforma Feminista d’Asturies llama a amosar el sofitu a la fuelga con banderes y brazaletes moraos. Arriendes de la manifestación les muyeres tan llamaes a concentrase de 12 a 12:30 en tolos Ayuntamientos d’Asturies o en casu de nun poder, a la entrada de los cientros de trabayu o nos mesmos portales de les cases.

This work is licensed under a Creative Commons Attribution 4.0 International License.