Paros nel trabayu o fuelga de curiaos nel llar, concentraciones a la puerte’l llugar de trabayu y de los ayuntamientos y un manifestamientu ensin precedentes nel movimientu feminista asturianu, ayeri les muyeres dieron un pasu más nel so enfotu d’algamar la naguada igualdá de drechos.

Demientres el manifestamientu, que percorrió les cais de Xixón durante más de dos hores, glayáronse conseñes feministes d’estremáu calter, percorriendo l’amplísima problemática de les muyeres dende dellos ámbetos,  ensin que faltaren los perconocíos “Nin una menos” y “Nosotres parimos, nosotres decidimos“ dica otros más maxinativos -“Menos barbis, más barriguitas”, “Manolo Manolín, la cena tu solín” “Nun me duel la cabeza, ye que nun quiero follar”- ataques a la ilesia – “Vamos quemar la conferencia episcopal”- al P.P – “Onde tan, nun se ven, les qu’aborten del PP”- y al patriarcáu en xeneral  – “Vosotros, machistes, sois los terroristes”.

   Escolinos del IES Xovellanos acompangaron a la so profesora de filosofía na protesta a la puerte l’Ayuntamientu de Xixón.

Tamién abondaron les pidiciones de sofitu a los homes, “Esto tamién ye cosa vuesa”, seique la presencia masculina foi abondosa nes movilizaciones y reivindicaciones del papel de la muyer nos cambios sociales.

Nel discursu, una alcordanza a les muertes, remembrando que n’Asturies ya inauguramos l’axenda prieta d’esti añu y un mensaxe: Toes somos refuxaes. “Refuxada ye aquella persona que, a consecuencia d’una situación de violencia, guerra o persecución se ve obligada a buscar abellugu… les muyeres vivimos en permanente estáu de persecución, violencia, vulneración de drechos… poro, desiximos proteición”

This work is licensed under a Creative Commons Attribution 4.0 International License.