Les aules vacies y les cais enllenes. Güei tocaba lleción de ciudadanía y drechu, asignatures qu’esti país ta endemasiao avezáu a suspender.

Educación asturiana, llibre, igualitaria, llaica, feminista, de baldre  y de calidá. Asina la quieren y asina la pidieron.

Nun son reivindicaciones nuees, nin muncho menos, pero fáense cada vegada ante un panorama más devastador y por una población ca vegada más fartuca, a tolos niveles, de ver como la dengunéen, d’aguantar qu’a la mocedá se yos vayan presllando les puertes.

La baxada continua del gastu públicu n’educación, l’amenorgamientu d’hores o la cenciella eliminación d’asignatures fundamentales pal desendolcu del pensamientu críticu, comu la filosofía o l’arte, la obsolescencia del sistema educativu, la mercantilización de la universidá, la nula atención a la diversidá, les reválides, la nefasta política de beques -que pa enriba tien entá a miles d’estudiantes pendientes del cobru de la mesma-, la precariedá del profesoráu, los conciertos educativos, el 2+3 col so sistema elitista de másteres inasequibles, la masificación de les aules de la man del preslle d’otres…

Son tantes les reivindicaciones que se faen difíciles de resumir, seique’l representante del  sindicatu estudiantil LlEA averóse abondo na so intervención…”Estudiante ¿y si te tan robando los suaños?”

[cycloneslider id=”educacion”]

This work is licensed under a Creative Commons Attribution 4.0 International License.