L’Asociación de Pás y Mas de reciella con altes capacidaes d’Asturies denuncia la omisión de los escolinos con necesidaes especifiques de sofitu educativu nos impresos de matriculación

Un añu más, la Conseyería d’Educación, vien d’aprebar la resolución correspondiente al procesu d’escolarización pal cursu viniente omitiendo na so redaición les NEAE (alumnáu de necesidá especifica de sofitu educativu), escluyendo tanto a los rapacinos con dificultaes d’aprendizaxe como a los d’altes capacidaes.

Trátase d’un coleutivu estremadamente vulnerable y que llega a carecer emportantes problemes tantu presonales como de calter académicu si nun recibe a tiempu l’atención precisa, atención inclusu nos meyores casos insuficiente y polo xeneral inesistente, mesmo teniendo reconocencia oficial, como denuncien les families.

L’ausencia nos  formularios la casiella de NEAE  dificulta enormemente l’accesu a les places reservaes tal efeutu a les families que les necesiten y a les que, acordies la LOE y la LOMCE, tienen drechu.

APADAC remembra que l’añu pasáu ya hubo problemes con esti mesmu tema, considerándose que les conversaciones cola conseyería dexaren nidio la necesidá d’iguar la falta, polo que la so sospresa foi grande cuando vieron que se repetía l’error. L’asociación ufre asesoramientu a aquelles families que precisen d’información pa solventar esti problema.

This work is licensed under a Creative Commons Attribution 4.0 International License.