“Nun contestu de falta de reconocencia de los drechos llingüísticos de los asturianos -Oficialidá-, con calter escepcional y ensin continuidá práutica nin na escolarización nin na sociedá, esti plan ye un viaxe a dengún llau. Una nueva burlla del “Principado”

La polémica presentación d’un plan que  permitiría l’usu del asturianu como llingua vehicular foi acoyía con gayola por bona parte de la población asturiana, quienes creyeron ver venir por fin el naguáu díi nel que los sos fíos pudieren deprender na so propia llingua, daqué que punxo los pelos de punta a más d’un antiasturianu confesu.

Sicasí, la lletra piqueña contenía delles sospreses: l’asturianu llendaríase a tres asinatures, namás se daría la oportunidá en 10 colexos y pa que s’aplique tendrá d’haber consensu del Conseyu Escolar, siendo los pás y mas quienes tendríen que solicitalo.

Crease asina una situación d’escepcionalidá que ye tolo contrario a la  pretendía normalización. Asina, lo que paez un avance emportante na llucha pol asturianu tórnase na inclusión d’estos neños nuna triba de guetu llingüísticu ensin continuidá nin académica nin social, suponiendo claro que cunten col permisu del  total de la comunidá educativa, daqué que vulnera direutamente’l drechu de les families a decidir so la educación de los sos fíos.

Una vegada más l’atención ciéntrase en temes secundarios, allonxando del alderique la única y vraera cuestión, la reconocencia de los drechos llingüísticos del pueblu asturianu, ello ye, la Oficialidá de la llingua d’Asturies, puntu mínimu de magar el que se pue avanzar na so recuperanza y normalización.

Acordies la visión d’Andecha  Astur esto nun ye sinón un xuegu col que’l PSOE quier crear un falsu alderique, xugando coles ilusiones de munches families, “col únicu enfotu de continuar dando la impresión de que fain daqué pola llingua d’Asturies, pero ensin qu’esi daqué implique nin drechos llingüísticos, nin continuidá, nin avances socialmente positivos, afondando nel guetu de “los de la llingua”, con un misérrimu plan ensin percorríu nin compromisos, escaeciendo lo principal: la falta de reconocencia de los drechos llingüísticos de los asturianos, y la situación de represión y amenorgamientu llingüísticu al que mos somete’l propiu “Principado”.

This work is licensed under a Creative Commons Attribution 4.0 International License.