Tres de la movilización estudiantil motivada polos ataques del estáu español a la educación pública, convocada a nivel estatal pol “Sindicato de Estudiantes”, delles voces acusen al mesmu de facer de menos a los sindicatos asturianos

En nuesu país la mocedá fue convocada en Xixón y en Uviéu a les 12:00 am en concentraciones con perbona rempuesta nes que millares d’estudiantes reclamaron los sos drechos educativos.

Sicasí, la xornada tuvo marcada por diferentes incidentes incómodos que crearon ciertu maltar pente los estudiantes. Per un llau, en Xixón, un grupu d’unos treinta neonacis acudió a la manifestación con evidente intención de crear problemes, teniendo que ser desaloxaos pola policía.

Per otru llau, n’Uviéu, el Sindicato de Estudiantes, tras compartir micrófonu con UXT y CCOO, impidió la llectura del discursu de Bloque Criticu Estudiantil, poniendo música al altu la lleva demientres el compañeru falaba, lo que xeneró un evidente descontentu pente los miembros del bloque, que repitieron el so discursu al final, con evidente menor públicu. Daqué asemeyao pasó en Xixón, onde tres de la so intervención, na qu’animaren a sentase a escuchar al públicu, la portavoz del Sindicatu d’Estudiantes dio por fináu l’actu animando a los presentes a llevantáse y dir a afiliase darréu nel S.E, ignorando al representante de la LlEA qu’esperaba pa falar y que dio’l so discursu cola mayoría de la xente ya abandonando la plaza.

Estos son incidentes que pueden paecer de menor importancia, pero que francen la tan necesaria xunidá de la llucha estudiantil, anteponiendo porgüeyos  presonales al  mensaxe conxuntu, que nun ye otru que la fin del sistema educativu actual, anticuáu ya  ineficaz, desixendo una educación asturiana, autoxestionada, de calidá, llaica, antipatriarcal y de baldre.

This work is licensed under a Creative Commons Attribution 4.0 International License.