En Xixón, el prósimu sábadu 18, en Candamo el pasáu 10 de Marzu y a lo llargo del añu, en dellos colexos de tol país colos Sidrocoles. Los neños y neñes de dellos conceyos d’Asturies tán llantando árboles autóctonos, recuperando viesques pal futuru

El vienres pasáu setenta y cinco neños del colexu públicu Prieto Bárganos  de Candamo averáronse acompañaos  de los sos profesores a la rodiada de l’área d’arruelu la Degollada,  nuna xornada de reforestación na que, amás de crear una viesca de la que quiciabes esfruten los sos nietos, concienciáronse  de la importancia de curiar el mediu ambiente.

A Xixón tóca-y esti fin de selmana. Con  motivu del Día Internacional de los Montes, va ñacer  “La Viesca de Xixón” nun terrén yá preparáu pa tal fin nel  Polígonu Industrial  de Porceyo, siguiendo asina una tradición ñacía l’añu pasáu al llantar “La Viesca la Reciella”, con más de quinientos árboles autóctonos. Mientres el  llantáu los neños van tar acompangaos de dellos personaxes mitolóxicos y los mayores que los acompañen van esfrutar d’unes botelles de sidra.

Dientro d’esti tipu d’aniciatives, nes que los más pequeños  se comprometen col mediu ambiente y aprienden a curialu  por aciu una aición direuta, tán los “Llantaos de pumar” que l’asociación Sidrocoles lleva a los colexos qu’asina lo soliciten, convertiendo les zones verdes de los  patios en pequeñes pumaraes.

This work is licensed under a Creative Commons Attribution 4.0 International License.