Güei cellebraráse la IV edición del concursu Meyor Primer Sidre L’Añu, na Sidrería El Otru Mallu, con 40 llagares iscritos pesia qu’esti añu la sidre vien daqué retrasao.

El concursu, entamáu pola revista LA SIDRA y la Fundación Asturies XXI, va tener llugar na sidrería xixonesa El Otru Mallu allugada na cai Sanz Crespo 15,  y va escomenzar a les 16:00 hores. Na primer parte de la xornada escoyeránse les 5 sidres finalistes.

A les 18:30 hores escomenzará la final na que se va otorgar el premiu a la sidre ganador. L’asistencia a les delliberaciones sedrá abierta al públicu. Al términu del concursu los asistentes que lo deseyen van poder prebar les sidres clasificaes y ganadores.

El xuráu tará presidíu por Manuel Bustu, y va tar constituyíu por Joaquín Fernández, Donato Xuaquín Villoria, Eloy Gómez, Ricardo García y Manuel Castro. Pal serviciu d’echáu va cuntase colos meyores echaores del Campionatu Oficial d’Asturies.

La sidre premiao sedrá la oficial de la VIII edición de la Primera Sidre L’Añu, la espicha más grande d’Asturies y que marca l’entamu de la temporada sidrera, y que se cellebrará del 13 al 16 d’abril nel Muséu del Pueblu d’Asturies en Xixón.

El premiu a La Meyor Sidre L’Añu ye l’únicu concursu que tien como protagonista la sidre ensin trasegar y que tien retribución económico –1.000 euros en sidre–. Por esti motivu asitióse como ún de los concursos de referencia de la nuesa bébora tradicional.

Dende va ocho años LA SIDRA y Fundacion Asturies XXI escomenzaron a trabayar pola recuperanza d’esta triba sidre, que práuticamente esapaeciera del mercáu pola industrialización de los llagares y l’aplicación xeneralizada de los trasiegos. Ca vegada son más los llagares que s’animen a comercializar esta sidre con una participación estable nel certame.

This work is licensed under a Creative Commons Attribution 4.0 International License.