El IV concursu Meyor Primer Sidre l’Añu finó col trunfu de Buznego dempués d’un abegosu desempate con Canal, fasta’l postrer culín.

LA SIDRA.- La Sidrería El Otru Mallu, foi l’escenariu nel que se desendolcó na xornada d’ayeri’l IV concursu de la Meyor Primer Sidre l’Añu nel que participaren 40 llagares, lo que perafita de nueu esti concursu como ún de los principales del país.

El concursu, que cuntó col campión d’echaores 2012 y 2013 Wilkin Aquiles pa servir la sidre, foi enforma reñíu dende’l primer momentu, de tala miente que na preseleición hebio que clasificar 8 llagares, en cuenta de los 5 que nun principiu se tenía camentao: Canal, Herminio, Estrada, Buznego, Juanín, Piloñu, Cabueñes y L’Allume.

El xuráu, presidíu por Manuel Busto y costituyíu por  Joaquín Fernández, Donato Xuaquín Villoria, Eloy Gómez, Ricardo García y Manuel Castro, tovieren d’esforciase enforma a la hora de faer les tasties. De fechu, la sidre de Buznego y la de Canal tuvieron que pasar por un desempate final pa escoyer la ganaora, trunfando al final el llagar maliayu, y les dos siguientes, Estrada y Cabueñes, quedaron tamién empataes compartiendo’l tercer puestu.

La sidre premiao sedrá la oficial de la VIII edición de la Primer Sidre l’Añu, la espicha más grande d’Asturies cola que se marca l’entamu de la temporada sidrera. Cellebraráse del 13 al 16 d’abril nel Muséu del Pueblu d’Asturies en Xixón, y esti añu cuntará con interesantes novedaes.

This work is licensed under a Creative Commons Attribution 4.0 International License.