Esta mañana, de magar les nueve y cuartu, decenes de presones concentráronse delantre los Xulgaos de Xixón en sofitu a la plantiya de Modultec

Redaición InfoAsturies

Ye una llarga historia. En marzu del 2.015 la empresa Moldutec declara un ERTE, que nun ye sinón una variación de los ERE´s, na que la empresa recibe autorización pa suspender temporalmente los contratos de trabayu. Cinco meses dempués, en xunetu de 2.015, declara un ERE d’estinción qu’acarreta’l despidu de 42 trabayaores de los 92 que componíen la plantiya.

Tres trabayaores, afiliaes de la CSI, reclamen ya’l xulgáu de lo Mercantil de Xixón declara nulu’l so despidu, argumentando que foron despidíes pola so actividá sindical.

Darréu, el TXSA, en xunu de 2016, declaró nulu’l despidu d’otros 24 trabayadores qu’impugnaren l’ERE, dictaminando que nun esistió un criteriu oxetivu na escoyeta de les trabayadores a despidir y que la causa del despidu de les muyeres foi la discriminación por razones de sesu. Arriendes d’ello, el TXSA confirmó na so sentencia la nulidá del despidu de les trés compañeres de la CSI que ya dictaminara’l Xulgáu de lo Mercantil.

Agora, dos años dempués de declarar l’ERTE  y a piques de finar el so plazu,  los trabayadores de Modultec tornen a atopase na mesma situación que los llevó al ERE d’estinción, ensin recibir nengún tipu d’información, nin por parte  la direición, nin por parte del Comité d’Empresa, onde tan presentes UXT y CCOO.

Ante la inseguridá que conlleva esta situación, los trabayaores llamen a la solidaridá y remembren a toos que tres la so fundación y puesta en marcha en 2002, Modultec recibió ayudes europees, estatales, autonómiques y municipales, ente elles suvenciones pa la contratación de muyeres, llegando a algamar trescientos trabayadores, númberu que foi amenorgando en favor de la subcontratación, les hores estrés y los contratos eventuales.

This work is licensed under a Creative Commons Attribution 4.0 International License.