El trabayaor, acusáu por unes pintaes en Villaviciosa, vien de ser absueltu en sentencia dictada pola Audiencia Provincial
Llucía Fernández Marqués
Acusáu d’un delitu de daños escontra la propiedá, la defensa alegó dende’l primer intre que les pintaes denunciaes nun constitúin un delitu, sinón qu’encaxen perfeutamente nuna infraición lleve de desllucimientu, recoyida nel artículu 37.13 de la Llei de Seguridá Ciudadana. Sicasí, la menacia de prisión caltúvose dende’l primer intre por mor de l’acusación particular de “El Corte Inglés”, propietarios del edificiu nel que se fexeron les pintaes, qu’aporfiaron en pidir la consideración de delitu.
Finalmente l’Audiencia Provincial dio-y la razón con una sentencia sentencia absolutoria que namás aporta dempués de meses de movilización social nel que la sociedá asturiana dexó nidio’l so sofitu.
Nun emigres, llucha. Esi yera’l mensaxe qu’Aitor quixo tresmitir a los asturianos, el mensaxe pol que tuvo a piques de dir a la cárcele. Cola so pintada trataba de denunciar la emigración económica a la que se ven forzaos miles de trabayadores asturianos p’atopar un trabayu y una forma de ganase la vida.
El casu d’Aitor valió pa sacar a la lluz un problema nel qu’elli nun ye l’únicu esponente, ca vegada son más les presones que se sienten nel banquín por protestar escontra la inxusticia, centenares de presones n’Asturies son xulgaes por defender drechos básicos como’l trabayu o la vivienda.
This work is licensed under a Creative Commons Attribution 4.0 International License.
