David Castañón – www.lesfartures.com – @lesfartures
Dos grandes eventos como resume d’una selmana importante pa la gastronomía asturiana.
El llunes fallaben los premios a la X Edición del Campeonatu d’Asturies de Pinchos y Tapes. Xuráu de sonadía colo meyor de la gastronomía pa premiar al Medio Lleno col so pinchu “Tacu Tai”. Restaurante Blanco col so “Pepito de Ternera 2017” y La Mar de Tapas con “Fardel de Centollu” quedaron segundu y terceru respeutivamente.
Demostróse, un añu más, el gran nivel que tenemos n’Asturies nel que ye, ensin dulda, ún de los meyores concursos de pinchos de la Península Ibérica, y que va ameyorando añu a añu.
El martes, ensin casi tiempu a reponenos d’una final llena d’emociones colos alderiques que siempres se xeneren, fallóse’l Premiu a La Meyor Fabada del Mundu 2017. Casa Chema revalidó’l títulu que llogró nel 2011. El platu cabezaleru del restorán ye la fabada (pertenecen al movimientu slow food, esto ye, platos cocinaos siempres con materia prima de la so redolada), pero vas poder atopar dende gochu asturcelta hasta pexes pasando por postres caseros, siempres tou de primera calidá.
Fabada y pinchos, dos concursos qu’atraen muncha xente, son reclamu turísticu y mueven abondo dineru. Y esti fin de selmana XXIV Xornaes de Les Fabes en Villaviciosa, yo que tu acutaba …
This work is licensed under a Creative Commons Attribution 4.0 International License.
