La Plataforma d’Afeutaos pola Hipoteca y los Desfiucios d’Asturies celebra con un conciertu’l so quintu aniversariu
Esti añu cunten con un importante cartelu d’artistes: Ismael Serrano, Delagua y Nachu Vegues van ser los que sofiten cola so música la impresionante llabor d’esti colectivu.La cita va ser el domingu 26 de Marzu a les 20:00hores, na xixonesa Sala Acapulco y va sirvir pa recaldar fondos pa la PAH.
Nestos cinco años paralizáronse gracies a PAH yá seya pola via llegal o o pola aición direuta, miles de desfiucios. Entá asina, nel 1.016 na menos que 1.144 families asturianes viéronse espulsaes de llar. Seique la cifra pueda paecer inferior a les d’años anteriores, la realidá ye que ye una circunstancia acumulativa, esto ye, qu’estes casi mil quinientes families vienen sumase a les que yá teníen a entamos d’añu problema de vivienda.
Dende la PAH insisten en qu’esti conciertu tien de ser una fiesta, pero tamién un actu reivindicativu una y bones el problema habitacional nesti país ta lloñe de solucionase; quieren recordar que cada desfiuciu ensin alternativa habitacional ye una vulneración de los drechos humanos, que tolos desallugos hipotecarios que se realicen n’Asturies tán llevándose a cabu so una llei inxusto y declarao illegal pol Tribunal de Xusticia de la Xunión Europea siete vegaes.
Agora mesmu n’Asturies los desallugos por execuciones hipotecaries tán paralizaos, gracies a la sentencia Europea del 26 de Xineru, pero siguen dándose desfiucios por arriendu.
Son munches les families qu’inclusive tán viviendo segundos desallugos, esto ye, qu’en perdiendo la so vivienda -pero calteniendo la delda- aporten al mercáu de la vivienda d’arriendu, nun pudiendo faer frente a dambos pagos, dada la situación económico y llaboral del país.
Por eso dende la Plataforma d’Afeutaos pola Hipoteca d’Asturies sofiten cinco midíes –tantes como años- pa frenar el problema, pol derechu a la vivienda y contra los desfiucios: La dación en pagu retroactiva – miles de families perdieron la so vivienda y que-yos quedó una delda pa tola vida- una reforma de la llei d’arrendamientos urbanos, la paralización inmediata de tolos desallugos de deldores de papu sanu hasta que tengan una alternativa habitacional, que toles viviendes que tán en poder de la banca pasen a viviendes sociales y que toles families tengan derechu a los suministros y al serviciu de lluz, agua y gas.
This work is licensed under a Creative Commons Attribution 4.0 International License.
