El domingu a les 07:00 a.m. (16:00 hora llocal) entamó una carrera peremocionante nel Circuitu d’Albert Park (Melbourne). Anque la pole foi pa Hamilton, los de Ferrari tuvieron cerca d’algamala y ya avisaba’l propiu Vettel: “Tamos equí pa lluchar”

Pedro Miguelez Casas

Na carrera’l pilotaxe de Vettel foi brillante y la estratexa del equipu tamién, el coche rindió y ensin problemes el pilotu alemán resistió na primer posición, tras consiguila escontra tou pronósticu nun circuitu nel que ye difícil adelantar. Dende Singapur 2015 que nun oyíamos l’himnu italianu nun podiu de F1, y esto nuna carrera d’entamu de temporada pue significar munches coses. l’otru Ferrari, Kimi Raikkönen, terminó cuartu detrás de los dos Mercedes polo que Ferrari ye agora’l primer equipu nel campeonatu.

Per otru llau, y como suel ser habitual en Melbourne (por ser primer cita de temporada), 7 coches quedaron fora de carrera por distintos motivos. Ente ellos, Ricciardo col so Red Bull o Romain Grosjean.

Carlos Sainz pola so parte algamó la octava posición pero nun tuvo contentu cola decisión del equipu que-y obligó a dexar pasar al so compañeru pa que depués esti nun tuviera potencia p’adelantar a Pérez.

Alonso “Poques veces tuve un coche tan poco competitivu”

Quedaben solu unes vueltes pal final cuando’l pilotu asturianu tuvo qu’abandonar por un fallu na suspensión. Enantes d’esti problema taba na 10º posición, colo que s’alcontraba na zona de puntos. Paecía que’l coche nun yera tan malu pero na más terminar la carrera Alonso dixo a la prensa “Güei fici la meyor carrera de mi vida”, en rellación al esfuerzo que-y supuso tar nesa posición. “Poques vegaes va repitise lo d’esti fin de selmana, eso de ser 13º na crono y llegar a tar 10º. Este ye un circuitu estrechu y bacheáu onde la esperiencia cunta enforma, pero en circuitos normales la nuesa posición va ser peor” aseguró.

Lance Stroll abandona nel so estrenu na categoría reina

El nuevu pilotu de Williams tien críticos detrás dende’l día que’l so pá merco-y una plaza na F1. Como toos sabemos la Fórmula 1 ye un negociu y una de les formes d’acceder a un equipu ye pagando, anque d’esti pilotu de tan solo 18 años hai que dicir que tamién acumuló méritos nes categoríes inferiores (destacando l’añu pasáu ganando el campeonatu de F3).

El casu ye que los errores de Stroll ficieron al equipu perder un día de test en Catalunya y tamién parte de los llibres 3 en Melbourne. Na carrera yera cuando taba demostrando que yera un bon pilotu y que tenía ritmu y fuercies pa ganar posiciones cuando un fallu nos frenos terminó col so Gran Premiu. El equipu ta notando como Stroll ameyora y el propiu pilotu diz “El ritmu diba bien, cuando pisé’l frenu, el pedal fue muy llargu. Eso terminó cola mio carrera”.

Pues alcontrar más información en Formula 1 N’ast

Clasificación:

This work is licensed under a Creative Commons Attribution 4.0 International License.