Les consecuencies del cambiu global y la masificación turístico faen preciso la puesta en marcha d’un Plan de Proteición del Llagu Enol
Estudios desendolcaos pol Institutu Xeolóxicu Mineru costaten los efeutos nocivos que’l cambiu climáticu y la masificación turístico ta teniendo so l’ecosistema del Llagu Enol, en concreto, un marcáu procesu d’eutrofización de les agües, ello ye un xorrecimientu de la densidá de nutrientes nes mesmes, con un escesu de fitoplancton, plantes y otros organismos qu’al morrer consumen una cantidá d’osixeno –nel procesu de putrefacción- que fai les agües del llagu progresivamente menos aptes pa la mayor parte de los seres vivos que componen el so ecosistema.
El procesu ya ye costatable a simple vista, les agües del más emblemáticu los nuesos llagos van perdiendo la so tresparencia y arrecienden a podrén y l’espoxigue perriba de lo normal de les ‘Potamogeton’, plantes acuátiques propies del Enol entama a ser visible.
El descensu d’osixeno nes agües del llagu como consecuencia d’esti xorrecimientu de la flora y de la mayor presencia de materia orgánica afeuta ya a les fasteres más fondes, nel informe añal del 2.016 recoyíase que perbaxo los 25 m de fondura ya nun hai osíxenu disponible, coles evidentes y llacerioses consecuencies qu’ello tien, siendo previsible que’l problema vaiga afeutando progresivamente a capes menos fondes del llagu.
Por tou ello, el Patronatu del Parque Nacional de los Picos d’Europa tien previsto la puesta en marcha d’un Plan de Proteición del llagu Enol col que controlar el so riesgo d’eutrofización y ya se tan dando los pasos necesarios «pa poner en práutica medies de siguimientu de les condiciones hidrobiolóxiques, de gobernanza (información y participación social) y d’atenuación de los efeutos del Cambiu Global nel llagu Enol, ante’l proceso d’eutrofización manifiesta que presenta”, según pallabres del direutor de la vertiente asturiana del Parque Nacional de los Picos d’Europa, Rodrigo Suárez Robledano,
Los espertos confíen en qu’esti plan, qu’inclui midíes comu l’amenorgamientu o eliminación del accesu de ganao al llagu o’l control del aporte de materia orgánica al mesmu dende la fastera del Ercina, aporta a tiempu pa que la situación nun algame un nivel críticu
This work is licensed under a Creative Commons Attribution 4.0 International License.
