La Plataforma d’Afeutaos pola Hipoteca d’Asturies, PAH, nació en Xixón  de magar  les concentraciones del 15 M. Dende entós la so actividá nun paró de medrar y son centenares les families que tienen gracies a esti coleutivu un techu sol que dormir. Miguel Angel García, voceru de la PAH, malpenes puede disimular la so indignación al falar de los abusos de poder colos que financieres y bancos, col respaldu del gobiernu, desaposien a los ciudadanos de les sos viviendes

Llucía Fernández Marqués

La vivienda ye un bien de primera necesidá, l’articulu 47 de la constitución dizlo bien claro, esiste’l derechu a la vivienda digna, pero nun hai qu’escaecer la segunda parte d’esti artículu, qu’especifica que nun se puede especular col suelu, cola vivienda y equí toos tuvieron especulando, los gobiernos, financieres, inmobiliaries y empreses de tasación d’esti país.

¿Dempués de cinco año de llucha, cómo ves la situación actual?

A fecha de güei esperábamos tener una llei hipotecaria que respetara a lo menos la llei europea, porque enagora Europa sigue poniéndonos multes que pagamos toos colos nuesos impuestos.

Per contra vemos como un gobiernu dafechu cacique sigui sofitando los bancos y entidaes financieres, mientres la oposición sigue detrás del PP, sacando lleis que son un insultu a les persones a les que robaron… pero siguimos lluchando, n’Asturies paremos mas de mil desfiucios, por distintos medios, en puerta, xudicialmente o axustando col bancu pa nun tener que llegar a ello.

¿Cuálos son los mayores problemes a los que vos enfrentais agora mesmu?

Per una parte, los deshaucios d’arriendu, que son bien difíciles d’encarar, por otra, les persones que viven nuna situación de precarios, en llugares que nun son nin cases, o en viviendes emprestaes, munches vegaes en condiciones de habitabilidad infimes, y nin los conceyos nin el Principáu dan respuesta a esta situación

Y en tercer llugar atopamos con munches families que consiguieron un alcuerdu” cola entidá financiera y  qu’agora nos vienen con una situación muncho peor que si vinieren asesorase antes de roblar. Ufiertáron-yos faltes, reunificación de deldes, pagos menores… y engañaronlos, agora muncha xente vien con una delda mayor que cuando mercaron la casa y cuando recurren al bancu dícen-yos que d’alcuerdu, pero qu’hai que volver tasar la vivienda y claro, agora vale bien de menos… tienen que saber qu’esto nun ye asina, que tienen  qu’atenese a la tasación inicial, que si la vivienda tien menor valor ye responsabilidá d’ellos, pola so especulación, asina que les consecuencies nun pueden recayer sobre’l comprador. Tienen que saber que la dación en pagu tien de ser total, non parcial como fixeron en munchos casos, asina que por favor, anantes de roblar nada que vengan y asesórense.

Pa maquillar les cifres y camuflar el númberu de desallugos tán ufiertándose tou tipu de tratos, yá seya la condonación de parte de la delda o inclusive apurriendo perres por qu’abandonen la casa y evitar que creen polémica. Hai que tener enforma curiáu colo qu’ufierten, y asesorase.

Mentabes los desfiucios  d’arriendu… esa paez una tema revesosa

Cada vez hai más deshaucios d’arriendu, inclusive munches families que teníen una vivienda en propiedá y tuvieron que colar d’ella nun-yos quedó otra alternativa qu’arrendar,  y mientres los sueldos tean como tán, el trabayu siga en precariu y los arriendos xuban más que los sueldos, vamos siguir atopando con desfiucios al arriendu

Esti ye un problema con doble cara, la de los desfiuciaos y la de les families qu’arrienden, n’ocasiones pa pagar la hipoteca, y ven que l’inquilín nun puede faer frente a los pagos, de manera que ellos tampoco pueden pagar y vense espuestos a un posible desfiuciu.  Ye una tema delicada, cuando se trata d’un  desallugu hipotecariu ta demostrao que la banca ta sacando un beneficiu ilicito d’un bien de primera necesidá, sabemos que lo que va faer con ella ye presllar  la vivienda o en munchos casos malvendeles, pero cuando se trata d’un  particular ye bien estremao.

Los bancos tán dexando les viviendes vacies, o malvendiéndolas inclusive en paquetes que apuerten a hasta del 90% del el so valor de tasación, dempués  de negase a llegar a un alcuerdu con nós… tienen una responsabilidá enorme al especular con un bien de primera necesidá, agora quien arrienda una vivienda pa poder ganar un pocu más o pa pagar la hipoteca mismamente nun tien esa responsabilidá, hai que protexelu lo que nos vuelve a llevar a la necesaria reforma de la llei, una reforma que se fixo nel 2013 pero que consiguió lo contrario de lo que se pretendía, tenemos una llei d’arrendamientos urbanos que nun beneficia nin al propietariu nin al inquilín, nun da garantíes nin estabilidá, con diez díes de impago te pueden echar a la cai…

Ye imprescindible una verdadera reforma de la Llei Hipotecaria que s’afaiga a la doctrina europea. Pasaron trés presidentes, Aznar, Zapatero y Rajoy  desque Europa llamónos l’atención nesi sentíu, en 1993 y nengún fizo  y fai falta una reforma de la llei d’arrendamientos  urbanos que garantice tantu l’arriendu al propietariu como la estabilidá del inquilín.

Nun esiste cultura del arriendu y los arriendos siempres fueron altos porque interesó al gobiernu, siempres fixeron campañes a favor de la compra, non del arriendu, porque ye lo que-yos interesaba. Les midíes que tomen teóricamente a favor del arriendu son ineficaces dafechu.

En Xixón tenemos ayudes al arriendu que n’otres partes de Asturies nun hai, pero eso nun evita los desfiucios, porque la solución nun pasa por dar ayudes, sinón por una reforma de la llei d’arrendamientos urbanos. Les persones, por dignidá nun pueden vivir d’ayudes, tienen que poder vivir del so sueldu.

Amás de les reformes llegales, ¿qué solución proponeis pa desaniciar el problema de la vivienda?

Que la vivienda que tienen los bancos cerrada se destine a vivienda social, pero non como esti programa que quieren sacar de vivienda l’estáu nel que se vuelve a dar incentivos económicos a la banca si arrienda una vivienda a una persona desallugada, paezme invidable que vaigan recibir cantidaes inxentes de dineru que nun repercutiríen na sociedá, sinón poniéndoles realmente a disposición de la población.

Agora mesmo los bancos tán especulando cola vivienda vacío, el 2017 sábese que ye l’añu que la banca va empezar a arrendar, yá crearon les sos empreses, equí tenemos  Bellos y Ponga, la mayor inmobiliaria, que ye de Lieberbank, el Bancu Santander yá creó la so inmobiliaria…  van entrar nel mercáu d’arriendu, van poner los precios de mercáu, y a ellos nun-yos importa españar a la baxa’l mercáu del pa depués, cuando queden solo ellos, poder faer lo que quieran, porque tienen el poder y tienen les ferramientes que l’estáu ta dándo-yos.

Amás  nós siempres abogemos pola esistencia d’una banca pública y que cada unu depués decida si va a la pública o a la privada, lo que nun senos puede ye obligar a dir a la banca privada

¿Qué encamentaríes a les persones que cuerren riesgu de ser desanunciaes?

Por muncho que faigamos nós, la que se va a quedar ensin casa ye la persona, quien tien que lluchar ye unu mesmu y tamién quien meyor conoz el casu, pero tienen que venir y asesorase, tenemos documentación ya información al minutu de toles sentencies y cambeos.

Nosotros nun cobramos na, ni los nuesos abogaos, pol asesoramientu y/o documentos que tengan que preparar, asina que s’asesoren, antes de roblar cualquier cosa que pasen pola Plataforma, axuntamos tolos vienres nel centru municipal integráu del Llanu y si nun pueden dir que nos contacten pol facebook, movemos si fai falta, anque pidimos a la xente qu’allegue a les asamblees porque ye onde meyor van asesorase y van  conocer a otres persones que tán na mesma situación.

¿Veis posibilidaes de solución real al problema de la vivienda?

Esto tien una fácil solución, toles persones que tienen un problema d’estos salimos y movemos y esto íguase, lo que nun podemos ye esperar a ver si esti o aquel conceyu saca unes ayudes pa la probitú enerxética, nun esiste la probitú enerxética, lo que somos ye probes, porque si nun tengo como pagar la lluz y el gas ye que nun tengo pa otres coses, nun tengo pa un nivel de vida dignu.

Enriba somos probes pero non solo económicamente, sinón de derechos. Si la plataforma tuvo la puxanza que tuvo ye porque movilicémonos, tenemos aciones casi a diariu, ruta pelos bancos, dir a solicitar viviendes…ye un llabor continuu, nun tamos solo nes asamblees asesorando, sinón participando en tolos casos. Túvosenos en consideración, porque nun tuvieron más remediu, tantu que nos dixeron de too, filoetarras, terroristes… ye increíble, por lluchar por un drechu fundamental como la vivienda que ye lo que tamos faciendo y cumpliendo la costitución y que recibamos tou tipu d’acusaciones.

El terrorismu esiste, pero tamién y sobremanera el financieru, que nun se ve, nun tien sangre pero que tamién dexó un montón de muertos pel camín.

This work is licensed under a Creative Commons Attribution 4.0 International License.