Ta a piques d’entamar l’eventu qu’inagura la temporada sidrera, entamáu pola revista LA SIDRA y la Fundación Asturies XXI y que, por cinco euros, ufre la sidre nuevo de cerca d’ochenta llagares nel Muséu del Pueblu d’Asturies, en Xixón

Espichar la sidra del añu y prebar el resultáu del duru trabayu de la temporada ye la manera na que manda la tradición celebrar la selmana santa n’Asturies, y dende va ocho años tenemos la oportunidá de facelo a lo grande, na Primer Sidre l’Añu.

Pente’l 13 ya’l 16 d’abril la temporada sidrera arranca con esti eventu, que permite esfrutar de la sidre nuevo de más de 70 llagares por namás 5 €, y que vien de ser declaráu d’Arraigu Social pol Ayuntamientu Xixón.

Esti añu, la sidre oficial sedrá la del Llagar Buznego, que se fizo col galardón a la Meyor Primer Sidre l’Añu 2017, concursu nel que Sidra Canal quedó en segundu llugar y en terceru, a pre, Sidra Estrada y Sidra Cabueñes, d’entre na menos que cuarenta llagares participantes. Pa los que nun quieran o nun puean beber alcol, tampoco habrá problema, la PSLA cuntará con sidre’l duernu y sidre ensin alcol.

Pero la Primer Sidre l’Añu nun ye solo sidre: gastronomía y música’l país, baille, esportes tradicionales, tasties guiaes, xuegos pa la reciella, artesanía, talleres … una romería completa y muncho más.

El xueves 13, a la una la tardi entamará la folixa col pregón qu’esti añu dirá dedicáu a Constantino Ovín, Tino’l de La Barraca, emblemáticu presonaxe del mundiu sidreru asturianu recientemente fallecíu, cuntando como d’avezu col apadrinamientu de les confraderíes gastronómiques asturianes, y el culín nagural a cargu del Campión d’Echaores d’Asturies 2016, Salvador Ondó. El preslle sedrá a les 22 hores.

El vienres y el sábadu abriránse les puertes a les doce del meudíi dica les 10 de la nuechi, y la PSLA acoyerá, pente otres actividaes,  la cellebración del VIII Asturianada y Sidre, concursu de tonada sidrera que cuntará cola participación de les Escueles de Música Tradicional Manolo Quirós , La Quintana y la Escuela Casa La Cultura de Colunga.

El domingu la PSLA súmase a los “30 díis en bici”, siendo la entrada  de baldre pa tolos que lleguen al Muséu del Pueblu d’Asturies en bicicleta. Tamién tendrá llugar el VI Concursu de Sidre Casero fecho en maera, únicu na so especialidá y de participación abierta a tolos que mayen en casa. L’horariu sedrá esti caberu díi de doce a seyes de la tardi.

Pa consultar el programa completu, ver la páxina web de la revista LA SIDRA

This work is licensed under a Creative Commons Attribution 4.0 International License.