L’Asociación de Families Numberoses de Asturies (AFNA) axuntóse apocayá con  Belén Fernández Rionda (Coordinadora d’Infancia, Familia y Adolescencia) y con Ana Isabel Farpón Castañón (Conseyera de Servicios y Derechos Sociales) pa plantega-yos les principales demandes d’estes families

Llucía Fernández Marqués

El mayor llogru consiguíu na xunta ye’l caltenimientu de la categoría especial  dica que’l postreru de los neños fáiga-yos perder la so condición de familia numberosa. Esto ye, aquellos que seyan F.N. Especial nun van poder ser Xeneral porque’l númberu de fíos que-yos condiciona vaiga menguando.

Un de les temes que más esmolez a les families son los retrasos na consecución de los carnés de familia numberosa, un trámite aparentemente cenciellu –cuando una familia ye numberosa, yelo, ensin necesidá de muncho entueyu pa comprobalo- pero que llegó a allongar hasta un añu d’espera, por cuenta de la escasez de personal y tiempu dedicáu a esta xestión. Afortunadamente’l tiempu baxó, una vegada resueltu’l “pescuezu de botella” qu’anició’l cambéu de carnés, a “solu” trés meses. AFNA animó a les funcionaries encargaes del procesu a siguir trabayando pa consiguir que’l retrasu seya mínimu.

Les families pidieron tamién que se realice un censu de les families numberoses n’Asturies, asuntu lleva pindiu enforma tiempu, daqué a lo que se comprometieron dende l’alministración.

Otra de les reivindicaciones de les families numberoses ye’l llogru de dalgún puntu de baremación  a la hora d’escolarizar a los sos fíos, daqué reconocio esplicitamente na Llei Orgánica 2/2006, de 3 de mayu, d’Educación “…Cuando nun esistan places abondes, el procesu d’almisión va rexir polos criterios prioritarios d’esistencia d’hermanos matriculaos nel centru, padres, madres o tutores llegales que trabayen nel mesmu, prosimidá de la casa o del llugar de trabayu de dalgún de los sos pas, mas o tutores llegales, renta per cápita de la unidá familiar y condición llegal de familia numberosa …”

Entá y con tou lo espuesto, nun consiguieron que nel calendariu d’escolarización del próximu cursu 2017-2018 figure esti puntu al so favor, sinón namás un compromisu cara a cursos socesivos.

Les families numberoses asturianes apenes tienen sofitos en Asturies, pero’l mayor problema col que s’atopen los qu’algamen esta condición ye’l de consiguir información clara sobre los sos derechos, qu’en munches ocasiones son desconocíos inclusive polos trabayadores de l’alministración pública.

This work is licensed under a Creative Commons Attribution 4.0 International License.