El costante espoxigue de diagnósticos de TDAH (Trestornu por déficit d’Atención ya hiperactividá), non  solo n’Asturies –onde alredor del 9% de la población escolar recibe esti diagnósticu, lo qu’equival a ún o dos escolinos por aula-, sinón na mayoría de los países onde la escolarización ye xeneralizada, tien abondes llectures y plantega a los espertos y families munches cuestiones ¿a qué debe esti xorrecimientu? ¿cómo atender a estos neños nel ríxidu sistema educativu actual? Pero sobremanera ¿nun se tará hiperdiagnosticando?

L’hiperdiagnósticu non solo perxudica al menor víctima del erru, sinón al coleutivu TDAH en xeneral, yá que trivializa’l vraeru problema de los que realmente carecen esta condición.

Hai un coleutivu especialmente propensu a ser enquivocadamente diagnosticáu como TDAH, y ye’l de la reciella superdotao o d’altes capacidaes. Delles families de neños con esta peculiaridá, -qu’algama alrodiu’l dos por cientu de la población asturiana- denunciaron esti diagnósticu erróneu, que non solo -yos impón una etiqueta problemática sinón que torga que se-yos reconoza la so vraera condición y por tantu que s’atiendan les sos vraeres necesidaes.

Les persones superdotaes son inquietes por naturaleza, les sos mentes son más rápides, abúrrense fácilmente… estos escolinos tienen una edá mental bien perriba a la de los sos compañeros de clas y cuando se ven obligaos a repitir xeres monótones o que nun representen pa ellos nengún interés, revuelven, fadien o desconéctense dafechu.

Analizando un cuestionariu típicu pa profesores, la mayoría de los escolinos d’altes capacidaes que nun tán recibiendo la educación que precisen podríen ser identificaos positivamente como casos de TDAH, llevándolos a entamar un tratamientu con fuerte medicación qu’amás presenta numberosos efectos secundarios, lo que puede derivar en problemes entá mayores.

Llucía Fernández Marqués

This work is licensed under a Creative Commons Attribution 4.0 International License.