El lliberal Macron y la ultraderechista Le Pen foron los vencedores de la primer vuelta de les elecciones presidenciales
Namás cinco candidatos superaron el 5% de los votos: el lliberal Emmanuel Macron (24,01%), exmilitante del PS y ex-ministru d’Economía del gobiernu d’Hollande, col so movimientu ¡En Marcha!, que plantega sustituyir la dicotomía esquierda-derecha por progresismu-conservadorismu; la ultraderechista Marine Le Pen (21,30%), con un Frente Nacional qu’incorpora una imaxe cada vuelta más tresversal; el neogaullista François Fillon (20,01%), ex-primer ministru con Sarkozy, con Los Republicanos; l’ex-militante del PS Jean-Luc Mélenchon (19,58%), col so movimientu Francia Insumisa en pro d’una Asamblea Constituyente pa una Sesta República; y el militante del PS Benoît Hamon (6,36%), ex-ministru d’Educación del gobiernu d’Hollande, col hestóricu PS.
El nuevu mapa políticu de la República de Francia, que traviesa una crisis de llexitimidá institucional, presenta les vinientes novedaes:
- La superación del tradicional esquema bipartidista, nel cual un Partíu Socialista de centru-esquierda y un partíu neogaullista (con distintes denominaciones y refundaciones a lo llargo del tiempu) de centru-derecha alternabanse nel gobiernu. La progresiva perdida d’identidá social-demócrata o nacionalista gaullista de dambos partíos en favor del neolliberalismu hexemónicu a lo llargo de les dos décades anteriores pue ser una clave d’interpretación d’esti fechu.
- Una meyora ensin precedentes del Frente Nacional, que per primer vegada supera electoralmente a la derecha neogaullista. Un ésitu asina nun foi llográu nin siquier na primer vuelta de les elecciones presidenciales de 2002.
- La descomposición del Partíu Socialista, convertíu en quinta fuercia, mientres la mayor parte de les sos hestóriques bases sociales sofiten dos nueves plataformes polítiques, dambes lideraes por antiguos militantes del PS, la rexeneracionista ¡En Marcha! y la roturista Francia Insumisa.
- L’ésitu de la tresversalidá como ellementu discursivu acullá del modelu tradicional de partíu políticu
This work is licensed under a Creative Commons Attribution 4.0 International License.
