Alrodiu de quinientos escolinos apuntaos a llingua asturiana esfrutaron d’una mañana d’arruelu nel Muséu del Pueblu d’Asturies

Nesta XIV edición de los alcuentros cola mocedá “ Saca la llingua” foron once istitutos y un colexu los que s’averaron al Muséu a emplegar l’asturianu fuera del aula.

Pa ello pudieron asistir a dellos talleres: creación gráfica, doblaxe, baille, rock, narración oral, rap,semeyes, cocina de supervivencia, audiovisuales ya esportes y xuegos tradicionales.

A toa velocidá, porque les xeres yeren abondes, el tiempu xustu y la lluvia decidió tornar a Asturies xusto esta mañana, los rapacinos foron pasando d’una actividá a otra dica les doce’l mediudíe, onde tomaron el tiempu xustu pa xintar daqué anantes de llanzase a canciar col karaoke, probatiblemente l’actividá más esperada pola mayoría.

La importancia d’estos alcuentros nun ta namás nel fechu de que los rapacinos lo pasen bien y vean la nuesa llingua como d’usu normal n’actividaes estremaes de les académiques, sinón nel fechu mesmu d’alcontrase con dellos cientos d’estudiantes de la so mesma edá que comparten con ellos l’enfotu pola llingua llariega.

Redaición InfoAsturies

This work is licensed under a Creative Commons Attribution 4.0 International License.