David Castañón – www.lesfartures.com – @lesfartures
Fízose Sidra de Pera n’Asturies dende siempres. Ta más que documentáu. Siempres s’utilizó la pera asturiana cuando la demanda la sidra creció y la mazana asturiana daba pa lo que daba. Col tiempu, munchos llagareros asturianos afayaron que sale más baratu traer mazana (o camiones direutamente con mostiu) de fora, qu’utilizar la pera asturiana (una pera tien muncho menos rindimientu qu’una mazana) y a los nuesos díes llegó namás la tradición d’ellaborar sidra con mazana.
Pero un llagarero asturianu, esmolecíu pola innovación del sector, y apostando pola so modernización, recuperó l’antigua tradición d’ellaborar Sidra de Pera asturiana, utilizando pa ello Peres de Villamayor (Piloña).
El productu tuvo ésitu y empezó (como siempres) a ser reconocíu fora de les nueses fronteres (The 11th Añal Great Lakes International Cider & Perry Competition April 2016 Gran Rapids Michigan “Vda. Angelon Pera” Garlardonada cola Medaya de Plata, ente otros premios), y eso, en cuenta de suponer un estímulu pa otros llagareros, lo que fixo foi llevantar envidies.
Asina, va unes selmanes, una denuncia na Conseyería de Sanidá del Principáu d’Asturies, obligó a una visita al llagar Viuda de Angelón y resolvió qu’había que retirar del mercáu la Producción de Sidra de Pera por mor que -por llei-, la sidra namás ye de mazana.
¿Quién denunció? Nun lo sé, namás barrunto. Solo sé que la Conseyería nun actuó por entamu propiu, actuó por una denuncia, y ésta nun ye d’un consumidor particular. Yá vos digo que too apunta a otru llagar.
A partir d’ehí, podemos falar de que tenemos un Decretu Llei sobre la sidra, apocayá actualizáu, fechu en Madrid qu’evidentemente acoxa, y que nun recueye la variedá histórica de Sidra de Pera que se fixo n’Asturies. Llexislación recoyida n’otros países onde s’ellabora Sidra de Pera ensin nenguna torga llegal.
Podemos nomar Sidra Asturiano a una sidra ellaborao con mostiu traíu en camiones cisterna de Francia, pero nun podemos llamar Sidra Asturiano a una fecha con Peres de Villamayor.
Una vegada más somos nós mesmos los que ponemos les piedres nel camín, y una vegada más nin l’alministración asturiana nin la española, tán al altor de les necesidaes del seutor.
Gracies Sidra Viuda Angelon-Pomar por anovar, por apostar por un futuru pa la sidra, por xugavos tantu recibiendo tan pocu, y tou eso, ensin perder nenguna traza d’identidá y calteniendo les fondes tradiciones asturianes. Nós tenemos claro de parte de quien tamos.
This work is licensed under a Creative Commons Attribution 4.0 International License.
