Dos mil euros ye la cifra que se pidió a l’Asociación de Criaores d’Asturcones pa participar nel I Concursu Esposición de Caballos de Cangues d’Onis. Les demás races, según yos informaron, nun pagaben
El pasáu 23 d’abril cellebróse la I feria dedicada al caballu en Cangues d’Onis, entamada pola Conceyalía de Ganadería y Mediu Rural. Na muestra, a la qu’acudieron más de cien variedaes de caballos, llamaba l’atención una ausencia pergrande: la de los asturcones
Según Sonia D. González, secretaria d’ACPRA (asociación de criaores d’asturcones) la so asociación foi convidada a participar nel eventu, previu pagu de 2000€, daqué que llama poderosamente l’atención si se tien en cuenta que’l restu de races nun tuvieron que pagar p’asistir al mesmu. “Lo asturiano paga, lo foriato non. Son asturianos de cara ‘l turismu, Pelayo, Cuadonga, llagos y nada más.”
Esta discriminación facia lo propio tuvo la evidente consecuencia de que los criadores d’ACPRA decidieren nun acudir a la feria y concursu, col resultáu de que los miles de turistes que s’averaron fasta allí colaron de la mesma ensin siquiera ver lo meyor d’una raza milenaria y única, los asturcones.
Llucía Fernández Marqués
This work is licensed under a Creative Commons Attribution 4.0 International License.
