N’Asturies disparóse l’aumentu de la probitú, con una medría continua del númberu de families en riesgu de cruciar –perbaxo- la llende de la miseria; pero non solo hai más probes, sinón que los que yá lo yeren, sonlo entá más: la población más probe perdió nestos años una media del 32% de los sos recursos. Coles mesmes, sigui xorreciendo ca añu’l númberu de llares ensin ingresos.
Nun ye d’estrañar, poro, l’espoxigue del númberu de menores que tienen como únicu mediu de vida lo que los sos pás cobren del salariu social. Un de cada diez, faciendo un total de 10.070 menores que dependen d’esta renta mínima, un últimu recursu del que viven alrodiu d’unes 45.000 persones.
El perfil mayoritariu de los llares con neños probes son «monomarentales», les muyeres con neños a cargu lleven la peor parte de la crisis.
¿Cómo ye vivir del Salariu social?
Dexando a un llau la evidente cuestión moral qu’implica vivir d’aides sociales y la frustración de nun ser quien a atopar medios propios pa caltenese a un mesmu y a la so familia, vivir del salariu social ye, cuandoquier, abegoso.
Les cuantíes percibíes por persona varien en función del númberu de miembros de la unidá familiar; asina, una persona independiente que cobre’l salariu social va tener a la so disposición 443 €, entantu qu’una pareya va cuntar con 270 € por persona pa subsistir. Si hai neños pel mediu, la media personal sigui baxando: una familia de cuatro miembros va disponer d’aprosimao 170 € mensuales pa caún.
Teniendo en cuenta’l costu actual de la vivienda y la xubida de los costos enerxéticos (+70%) nun ye difícil atopase con families que cunten con pocu más de 60 € por persona y mes pa vivir. Imaxínense los meses, por casu, que toca mercar llibros y material escolar. Imaxínense tener que facer frente a una avería o enfermedá.
La desigualdá provoca tamién efectos na salú, y los más probes tienen peores vezos de vida y un accesu llindáu a servicios sanitarios non cubiertos, como l’oculista, el dentista o’l llogopeda. El 33 % de los neños con faltes económiques sufre sobrepesu por una alimentación poco afayaiza.
Les perspeutives pa estos neños y adolescentes son tamién negatives: por cuenta de la dificultá p’algamar a los estudios superiores y otres posibilidaes llaborales, envalórase qu’el 80 % de los neños más necesitaos van siguir tándolo d’adultos.
¿Cómo inflúi esto na economía del país?
Con un presupuestu global de 105 millones d’euros, el Salariu Social supón la partía con mayor pesu dientro de la Conseyería de Servicios y Drechos Sociales. Anque s’envalora qu’el 92% d’esti dineru tornará a repercutir na economía asturiana, va facelo al traviés de consumos básicos, ello ye, malpenes va xenerar riqueza.
Amás, al triplicase’l númberu de beneficiarios y solicitantes, los recursos humanos y materiales p’atender les solicitúes quedáronse escasos, dándose retrasos d’hasta un añu na espera pa cobrar, polo que si se quier faer del salariu social un mecanismu eficiente va ser necesario aumentar la plantiya dedicada a la so xestión.
Por tou ello, ye necesaria una urxente reactivación de los texíos económicos asturianos que dexe a toes estes persones incorporase a un puestu de trabayu dignu, ameyorando les sos condiciones de vida y coles mesmes participando na recuperación económica’l país.
Llucía Fernández Marqués
This work is licensed under a Creative Commons Attribution 4.0 International License.
