Ésitu de la romería pa families entamada nel prau del Lloredal col envís de xunir a tola comuña socioeducativa de la fastera Oeste de Xixón

El prau del Lloredal, nel barriu de la Calzada, enllenóse comu enxamás de reciella. Miles de families foron pasando a lo llargo’l díi peles actividaes organizaes pa esta xornada, que foi posible namás gracies a la implicación de los cerca de trenta coleutivos y los cientos de presones que desinteresadamente trabayaron pa facer realidá esti proyeutu. Colexos, AMPAS, clús esportivos, empreses d’ociu infantil, presones independientes, ONX’s, músicos, asociaciones d’estremada triba… la comunidá que queríen crear nació ya del mesmu fechu de ser quienes a coordinase pa facer posible’l díi d’ayeri.

La idega yera celebrar un díi d’aruelu en familia, onde la xente’l barriu compartiere’l so tiempu, seique a la hora la verdá pasaron perellí neños de munchos colexos de tol conceyu y non solo de la fastera… Normal, la cantidá d’actividaes, el díi soleyeru y lo afayaizo del sitiu tuvieron un importante efeutu llamada y acomuñaron families de tou Xixón.

La xornada entamó a les once la mañana colos talleres (cocina, pintura, manualidaes, pintacares y chapes) los xuegos tradicionales  – de la man de El Garrapiellu- y los xuegos esportivos, incluyendo una prestosa gymkana en bici entamada por “30 díis en Bici”. A les doce, les pómpares xigantes invadieron la zona de la panera, debaxo de la que dempués se movieron los más animaos cola minidisco de “Despreocupate”. Depués d’un descansín pa la xinta en prau les actividaes entamaron otra vegada alrodiu de les tres de la tardi, con más talleres de música  y baile. El preslle echólu la Charanga Ventolín alrodiu les siete, seique entá foron abondes les families que quedaron allá, esfrutando d’una de les zones verdis menos conocíes de Xixón.

Llucía F. Marqués

This work is licensed under a Creative Commons Attribution 4.0 International License.