Susana Díaz llegaba a Xixón pa dar un mitín de la so campaña como candidata a la secretaría xeneral del PSOE. Como yera d’esperar, nel actu aconceyó bona parte de la oficialidá de la FSA, ocasión que les Asamblees d’Estudiantes de la Universidá d’Uviéu nun quixeron dexar pasar pa llevar la so reivindicación de baxada de les tases universitaries, como recoyía en programa ellectoral de la FSA-PSOE. Nun atoparon precisamente comprensión nin autocrítica.
Les protestes estudiantiles toparon esta vez cola violencia verbal y física del PSOE nesta ocasión. Les Asamblees d’Esstudiates lleven tiempu protagonizando actos visibilizando que les tases universitaries n’Asturies son desproporcionaes y afueguen al estudiantáu. Protagonizaren protestes delantre la Xunta Xeneral o nel actu de presentación del Llazarín de Tormes n’asturianu, onde participaba el Conseyeru d’Educación y Cultura Genaro Alonso. Les protestes pacífiques que vienen desendolcando nun tovieran problemes pero sí nestes alrodiu del actu “susanista”.
Como amuesen los videos distribuyíos poles Asamblees d’Estudiantes de la Universidá d’Uviéu, la esixencia del cumplimientu de programa ellectoral nun sentó bien nes files del PSOE, produciendose comportamientos violentos, mientres intervenía Susana Díaz. Los estudiantes denuncien agresiones dientro l’actu por un grupu de “susanistes” a varios estudiantes que fueron espulsaos a güelpes del actu, incluyñiu el presidente del Conseyu d’Estudiantes. Como se ve nel videu, algún militante del PSOE da instrucciones con un “pega fuera”. Ente los participantes, paez que taría el voceru del Grupu Municipal del PSOE n’Avilés Luis Ramón Fernández Huerga.
Tamién se denuncien agresiones fuera del recintu, nesta ocasión por parte del diputáu Fernando Lastra a quién diba grabando la conversación tranquila sobre les tases que teníen col presidente de la Xunta Xeneral, Pedro San Jurjo. Lastra, al que-y piden la dimisión les Asamblees d’Estudiantes por estos fechos, entró en planu y con un “no me grabes” entamó a repartir manotazos. Nun pasó desapercibíu, ya nel planu políticu, la frase dedicada por María José Ramos, ex-conseyera de Presidencia, “Oye, a quien votáis, que os lo resuelva”.
Pudo haber más violencia física, nun tercer vidiu sobre la conversación de los estudiantes con Nino Torre, diputáu na Xunta Xeneral y secretariu xeneral de les Juventudes Socialistas de España, hubo tensión pero quedó más en violencia verbal. Nesta ocasión, depués de que Nino Torre llamare “cobarde” al voceru estudiantil, Unai Díaz, voceru del Grupu Municipal del PSOE en Noreña y ex-secretariu xeneral de Juventudes Socialistas de Asturias, encaróse amenazante a un estudiante pa espetá-y a escasos centímetros de la cara, según parez nel videu, “él [por Nino Torre] no te ofrecio nada, voi a ofrecete yo lo que tu pides”.
Los actos escandalosos ocurríos mientres una protesta pacífica y que por mor del siguimientu mediáticu de Susana Díaz trespesó les llendes del país pa percorrer tola prensa del estáu nun pue tapar la vindicación de los estudiantes que desplicaben les causes de la protesta tamién nun videu.
This work is licensed under a Creative Commons Attribution 4.0 International License.
