Multen con 400 euros a la Banda de Gaites “Villa de Xixón” por tocar nuna espicha

La decimonovena espicha d’aniversariu d’El Llavaderu, na plaza d’Arturo Arias, nel barriu de Cimavilla finó con una intervención policial, que alcuerda a la invasión del llugar hai cuatro años con motivu de las protestes escontra la entós recientemente aprobada Ordenanza de Convivencia Cívica.

Namás dos hores y media enantes del so aniciu, la Policía Llocal comunicó al propietariu d’El Lavaderu, Roberto Campomanes, que’l permisu yera denegáu pol Ayuntamientu anque «non hebo nenguna denuncia vecinal». Con tola comida y la sidra mercada, consideró afayadizu realizar la folixa d’una manera más discreta, pero la Policía Llocal volvería una vegada más.

Nesi momentu ba tocando la Banda de Gaites “Villa de Xixón”. Llevaben tocando unos cuatro minutos. Non muncho más tarde, amás de ser suspendida la folixa, na cual diba a actuar el grupu “El Ventolín”, cuatro persones, ente elles el director y el presidente de la banda de gaites, seríen sancionaes con multes por tocar ensin permisu, aplicando asina les normes de la cuestionada Ordenanza de Convivencia Cívica.

Casualmente resulta que la Banda de Gaites “Villa de Xixón” yá tenía un conflictu abiertu col actual equipu de gobiernu municipal pola so falta de compromisu col conocíu festival internacional de gaites que se cellebra tolos años nel branu, polo que tenía convocada una concentración de protesta pa ayeri pela tarde na plaza del Ayuntamientu, acto desendolcáu ensin nuevos incidentes policiales nin sanciones municipales.

Ún de los multaos, José Luis García, el director de l’agrupación musical, declaró que van recurrir les multes. “¿Qué debemos facer entós coles más de cincuenta actuaciones que tenemos en tol añu na ciudá en ilesies y n’espacios al aire llibre? ¿Ónde van a poner la llende dende agora?”. Tamién esplicó que négun de los 25 componentes de la banda taba informáu de que’l hosteleru qu’entamaba la espicha en Cimavilla nun tenía l’autorización municipal afayadiza pa realizar la espicha. Amás refuga que la Policía Llocal actuase a instancia de los vecinos como sostien el conceyal de Seguridá Ciudadana, Esteban Aparicio, que nes redes sociales presumió argullusu de l’actuación policial proclamando que “la llei ye igual pa toos”.

This work is licensed under a Creative Commons Attribution 4.0 International License.