El director de ‘OK Diario’, Eduardo Inda, identificó al diariu vascu con ETA nun alderique televisivu

El casu empecipió hai dos años, en mayu de 2014, con motivu de la intervención d’Inda nuna tertulia de la cadena televisiva La Sexta, na que formuló frases como «según el Tribunal Supremu Euskal Herritarrok y Gara son ETA», «Gara ye’l periódicu d’ETA», o «el Sr. Iglesias participó nuna mesa redonda con un dirixente de Gara que ye voceru d’ETA».

Esi mesmu día, el director de Gara, Iñaki Soto, anunció la adopción de medies xudiciales. El casu correspondió al xulgáu d’Instrucción númberu 1 d’Alcobendas, que archivó la denuncia argumentando de que se trataba d’una «crítica política».

Pero l’Audiencia Provincial de Madrid ordenó a la maxistrada tomar declaración a Inda, que compareció como imputáu’l 12 de mayu de 2016. En sede xudicial reafirmó les sos anteriores declaraciones. Y nel esterior, cuando foi entrugáu por un periodista de Gara, la so rempuesta foi que «al periódicu d’ETA, nada».

Anque el xulgáu d’Alcobendas volvió a piesllar el casu,  l’Audiencia de Madrid agora considera que «nun pue negar la esistencia d’indicios de criminalidá», yá que al respective de les acusaciones d’Inda «nun puede negase el so calter calumniosu» porque nel auto d’archivu nun acreditó «la veracidá de les mesmes, nin siquier se manifiesta qué resolución del Tribunal Supremu sostien que Gara seya ETA o forme parte del so entramáu». Por eso, ordena al xulgáu d’Alcobendas «la reapertura de les sos actuaciones, dándo-yos el cursu debíu».

This work is licensed under a Creative Commons Attribution 4.0 International License.